ORANJESTAD (AAN): Den conferencia di Fraccion di MEP den Parlamento, Parlamentario Evelyn Wever-Croes a
elabora riba e ley di consensus (Consensus Rijkswet) cu Gobierno di Aruba a entrega na Conseho di Minister di Hulanda recientemente. E parlamentario a remarca cu esaki no a cana su caminda corecto y el a señala erornan cu a comete den esaki.
Na prome luga, no a informa niun hende
Parlamentario Wever-Croes a remarca, cu Gobierno di AVP-FUTURO a bay entrega e ley na Hulanda tras di lomba di tur hende. Nan no a informa Parlamento, no a informa gremionan y no a informa pueblo tampoco. Esaki ta nan prome eror.
Na di dos luga, nan no tin consensus
E ley cu nan a yama ‘Ley di Consensus’, a ser entrega na Hulanda dia 29 di augustus mientras cu Parlamento tawata wardando 7 luna pa Gobierno bay Parlamento pa duna informacion. E gobierno a yama e ley ‘Consensus Rijkswet’ pero ningun momento tawata tin un consensus riba esaki. Consensus, e parlamentario a enfatisa, no por bin di Gobierno sino e mester ta prueba cu tin un consensus di Parlamento. Sinembargo, Parlamento di Aruba no tawata sa di nada pasobra Gobierno a haci esaki sin informa ningun hende. Esaki ta nan di dos eror.
“Gobierno a comete un eror garaval gañando Hulanda cu nan tin consensus mientras nan no tin consensus. Si e fraccionnan den Parlamento cu ta sostene AVP-FUTURO a indica gobierno cu nan ta di acuerdo cu e decision aki, esaki no kiermeen cu e gobierno tin consensus. Un debate den Parlamento di Aruba mester a tuma luga cu ta mustra cu tin un consensus. Ta importante si e pa pueblo comprende cu e ley aki no ta bon pa Aruba”, Parlamentario Wever-Croes a expresa.
E parlamentario a sigui bisa cu Gobierno ta bisando hopi cos pa defende nan mes di e erornan aki, y ta bisa cu e ta un concepto nan a entrega na Hulanda y cu ainda por bay Parlamento di Aruba. “Pero, Parlamento di Aruba no por debati riba esaki mas y no por cambia nada mas. Parlamento di Aruba no ta esun cu ta bay vota riba esaki sino e Parlamento di Hulanda. Y ta na Parlamento di Hulanda por bin cambio, y pa bin cambio, mester tin mayoria di e mas di 150 parlamentarionan cu tin na Hulanda”, Parlamentario Evelyn Wever-Croes a enfatisa.
