“Nunca RAIZ a acerca ningun hende di oposicion pa forma un pacto pa vota pa Kamperveen”

Minister Ursell Arends, ta aclarea:

 *Arends ta pidi pueblo pa keda atento y vigilante 

ORANJESTAD (AAN) – Minister di Transporte, Naturaleza, Integridad y Asunto di Adulto Mayor, señor Ursell Arends, a wordo aborda pa prensa en conexion cu caida di Gabinete Wever-Croes, cuminzando e siman aki.

Arends a expresa cu e ta sigur cu Dialuna tur hende a lanta y habri siman unda nan tabata desea un otro “outcome”. Pero el a cuminza pa clarifica un narativa cu na RAIZ su parecer no tin sentido, pero cu ta circula eyfo.

“E ta wordo bisa cu RAIZ a forma un pacto cu oposicion p’asina aki por a vota y asina’ki por tin e presidente di Parlamento. Mi por bisa cu ya pa algun dia combersacionnan ta tumando lugar, y ayera atardi tambe un reunion a tuma lugar, caminda ami, como lider di Raiz a sinta cu e lider di Partido MEP, y nos a dialoga y nos a keda palabra cu despues di su Partijkraad, e lo yama mi pa bisa mi si e lo bin cu otro candidato di cual nan lo por garantiza e sosten di fraccion di RAIZ. Akinan nos a keda na spera di e yamada pa bisa e nomber di ken nan ta propone, p’asina aki nos por a sostene e nomber aki. Mi mester bisa cu te aworaki, unda mi ta para, ainda e yamada ey nunca a yega. Dus, esey mi kier a clarifica. Y mi a bisa ayera nochi tambe,  para na magazine, cu si nos no haya e nomber eynan nos lo sostene señor Raymond Kamperveen y esey nos a haci tambe. Boso por puntra cualkier lider of miembro di oposicion, ningun momento RAIZ a acerca nan pa vota pa Raymond Kamperveen”, Lider di Plataforma RAIZ, Ursell Arends a vocifera.

El a agrega cu ya caba den pasado, oposicion a vota, den su totalidad, pa Raymond Kamperveen, pues, esaki ta nada nobo.

Arends a comenta cu como RAIZ nan tin aworaki dos minister demisionario, y nan lo keda forma parti di Conseho di Minister te ora bin un gabinete nobo. Pero tambe, nan tin e voorzitterschap di Parlamento.

“Y mi kier pa comunidad di Aruba ta sigur cu na ningun momento nos lo permiti pa nos pais bira inmanehable. Pues, nos tin cu garantiza stabilidad y continuidad den Conseho di Minister, pero tambe nos tin e voorzitterschap di Parlamento, y no ta pasobra gobierno ta demisionario kiermen cu nos ta bay permiti weganan politico den Conseho di Minister ni den Parlamento. Parlamento ta e Organo di mas halto y nos mester garantiza e comunidad di Aruba stabilidad y esey nos lo haci tambe pa zorg tanto den Conseho di Minister como den Sala di Parlamento e pais por keda wordo maneha y tambe e continuidad y stabilidad por sigui. P’esey mi ta haci un yamada na comunidad di Aruba, pa ta atento y vigilante, pa esakinan tambe. Nos como Plataforma lo garantiza pero nos mester di pueblo tambe pa ta atento na esaki, pa hunto nos garantiza esaki”, Minister Ursell Arends a subraya.

Arends a añadi cu ora a wordo anuncia publicamente, cu Gabinete Wever-Croes 2 lo no continua mas, RAIZ a mira un cantidad di atake di coleganan cu a forma parti di Conseho di Minister, cosnan cu nan ta skirbi riba social media. “Mi kier djis bisa, cu esaki ta bisa hopi di nan, mas cu ta bisa di nos. Nos semper tabata un Plataforma profesional, nunca nos a bay den atakenan baho asina y nos no lo bay den atakenan personal asina, tampoco”, Minister Ursell Arends a remarca.