ORANJESTAD (AAN) – Recientemente Minister Demisionario di Finanzas, Economia y Cultura, mr. Xiomara Maduro, a expresa palabranan di gradicimento na tur ministerio y na Departamento di Finanzas, pa tur e trabaonan cu nan a desplega
pa locual ta e Presupuesto 2021.
El a splica cu Departamento di Finanzas ta esun cu a keda encarga di hinca e presupuesto den otro, pero tambe pa presenta esaki na un manera cu su persona, como minister, por a trece dilanti pa prensa, unda cada miembro presente por a haya su USB Memory Stick, mescos cu Parlamento di Aruba a haye.
Di e manera aki, nan tur por tin tur informacion pa por cumpli cu nan trabao di analiza kico ta bira e presupuesto di Aruba, cu ta e ley di mas importante di nos pais y divulga esaki pa comunidad.
Minister Maduro a expresa cu no obstante a yama pa eleccion, no kiermen cu Parlamento y Gobierno no tin legitimidad. Nan tin nan legitimidad, e mandatario a subraya y a reitera cu presupuesto ta e ley di mas importante di Aruba y pesey gobierno a haci un apelacion na Presidente di Parlamento y tur parlamentario pa trata e presupuesto.
El a acentua cu ta berdad cu gobierno ta laat cune pa motibonan obvio. “Pero di banda di gobierno nos a traha diligentemente, y mi kier gradici un biaha mas tur departamento, dentro di loke ta bira Finanzas y señora Jo-Ann Kock cu a encabeza tur e trabao aki, pa por facilita no solamente Parlamento, pero tambe tur miembro di prensa cu e informacion aki”, e dignatario a remarca.
