ORANJESTAD (AAN) Manera cu Ministerio Publico a mustra siman pasa caba, cu no ta descarta e posibilidad cu lo bay cay mas detencion den e caso di Avestruz
, ata siman a habri y a nota cu mainta oficialnan di Landsrecherche a bati na porta di un pareha pa asina detene nan.
Ministerio Publico ta confirma cu Dialuna mainta a detene dos persona.
Esnan deteni ta e ex-politico di AVP, esta Gaby Werleman y su pareha Ninosca D. Nuñez di 49 aña di edad.
Nan aresto ta den cuadro di e investigacion Avestruz di posible delitonan di corupcion y otro hechonan castigable relaciona cu dunamento di terenonan di gobierno.
“E caso di Avestruz ta dirigi su mes particularmente riba e pregunta si un of mas compania a wordo otorga incorectamente (un opcion riba) derecho di erfpacht riba terenonan di pais Aruba den e añanan 2009 te 2017”, segun Ministerio Publico ta indica.
Loke ta notable ta cu e dos personanan aki ya caba na 2017 a wordo aresta relaciona cu e caso di IBIS, den cual a aresta ex-Ministro Paul Croes.
Biaha pasa, Ninosca D. Nuñez su aresto tabata relaciona cu su trabao di tramitador y procesador di permiso di estadia y permiso di trabao. Den e caso IBIS, na final Huez a declara tanto Werleman como Nuñez liber di tur acusacion. Sinembargo Ministerio Publico a apela e caso, y ainda ta wardando riba e tratamento di esaki na Corte Superior.
Awor na 2021, e investigacion cu ta andando rond di hacimento di negoshi cu tereno di Gobierno a tuma un rumbo unda cu poco-poco ta arestando personanan importante pa asina interoga nan, y asina e team investigador por pone e puzzle hunto, pa na final Ministerio Publico analisa tur cos y tuma decision si acaso ta bay persigui e personanan aki legalmente of no.
Mientras tanto siman a habri tambe cu e informacion cu e dama hoben Rebecca Richardson, como tambe e otro persona Jeff Franken a finaliza cu nan interogacion y Fiscal a duna OK pa nan wordo libera bek.
Te cu Dialuna atardi, ainda e ex-locutora di Canal 90, esta Leoncita Arends ta wordo interoga.
