Parlamentario Evelyn Wever-Croes:
ORANJESTAD (AAN): Parlamentario Evelyn Wever-Croes ta enfatisa cu ta importante pa comprende e seriedad di e biahe di Minister Gerlien Croes den e jet priva. Segun declarcion di Minister Croes, e mes a paga e biahe aki for di su propio saco mientras cu doño di e jet a declara cu e no a ricibi niun pago.
E minister a bisa cu el a paga algun cien Florin pa, mientras un private jet lo costa algun mil Florin. Y tambe e minister a declara cu e no tin mester di duna cuenta na Parlamento pasobra tabata un biahe priva mientras esaki tabata un biahe oficial. E hecho ta cu Minister Gerlien Croes te ainda no a presenta niun prueba cu el a paga.
Segun Parlamentario Wever-Croes, e biahe di Minister Croes ta un biahe oficial, den su capacidad di minister, y ta crea pregunta riba su integridad, independencia y transparencia. Mientras cu Minister Croes a declara cu e mes a paga e biahe, segun Parlamentario Wever-Croes, esaki no ta suficiente. Minister Croes mester duna claridad na ken, cuanto y ki dia el a paga,
Parlamentario Wever-Croes ta opina cu e minister ta stroba Parlamento di evalua si e pago a ser haci conforme e balor di mercado of si tin un beneficio of un regalo mara na dje. E codigo di conducta ta duna interpretacion amplio na e palabra regalo. Y ora cu paga 100 Florin pa algo cu bal mil Florin, den e caso aki, e diferencia di 900 Florin ta ser considera como regalo.
“Esakinan ta principionan basico pero e minister ta nenga di duna cuenta na Parlamento y esaki ta crea mas desconfianza cu su actitud di haci mofa di Parlamentarionan cu ta cuestion’e”, Parlamentario Wever-Croes a expresa.
Segun e parlamentario a sigui bisa, e informacion cu Fraccion di MEP ta pidi, no ta pa interes personal. “Ami no tin niun interes di sa con e minister ta bay di A pa B. Pero e ta mi deber pa controla su trabao y e como minister”, e parlamentario a duna di conoce.
Segun Parlamentario Wever-Croes, Fraccion di MEP ta para fuerte den esaki pasobra pueblo ta pidi claridad y tin derecho di haya claridad specialmente e hobennan cu awe ta hopi decepciona cu nan a deposita nan confianza den un persona cu no ta duna claridad y ta sconde y hasta ta gaña, esta Gerlien Croes.
