Mike ta sconde su berdad tras di intento fraude di eleccion

ORANJESTAD(AAN)- Uno di e preguntanan mas grandi den historia di politica na Aruba, awe mester wordo lansa. Cu ki cara Mike Eman ta presenta su mes dilanti Pueblo

electoral di Aruba y sigur pa bolbe lanta un acusacion, cu por tin consecuencia grandi pa Aruba den exterior?

Ayera Aruba a wordo sorprendi pa e ultimo wega politico di Mike Eman, na momento cu wega politico a dal contra su mes y caso tras di caso cu a resulta for di su gobernacion, ta bou investigacion di Ministerio Publico.

Pa un parti grandi di Pueblo di Aruba, tabata algo increibel cu Mike Eman, un homber cu a bisa cu el a studia ley, por a bini dilanti cu un acusacion serio manera fraude di eleccion, cu e lo a trece dilanti den un carta cu el a entrega na Gobernador di Aruba.

Di e forma aki Mike Eman a bolbe mishi cu e imagen di Aruba den exterior, cu a sufri serio na man di e gobernacion di Mike Eman a base di e forma ridiculo, sin responsabilidad y di abusa cu Mike Eman a logra goberna na Aruba.

For di eleccion 2013, Pueblo di Aruba mester a lanta para contra Mike Eman cu tabata na haltura cu su momento critico a yega y cu cualkier momento Gobierno di Reino lo a bati na porta.

Awe cu prueba den man, DIARIO ta mustra con Mike Eman a trapa riba leynan cu ta atende cu gobernacion di Aruba pa e destrui intencionalmente e pais cu a duna su persona oportunidad di destrui e imagen di Aruba den Reino y na mundo.

Rapportnan cu berdadnan cu nunca a alcansa Pueblo di Aruba prome cu 2018 manera mester a sosode, a keda presenta door di DIARIO durante e investigacionnan periodistico mas grandi cu DIARIO a realisa riba nivel local y internacional for di dia cu el a presenta su mes como matutino di Aruba.

Na 2009 Mike Eman a gana eleccion a base di e promesa cu e ta bay deshaci di BBO. Awe DIARIO ta presenta prueba, cu Mike Eman tabata na haltura cu e no por a deshaci di BBO, sin causa problema financiero grandi pa Aruba cu na momento cu BBO a wordo introduci, ya a conoce cambionan cu a afecta otro tiponan di belasting.

Awe DIARIO ta presenta como su acusacionnan directo contra Mike Eman, e rapport di Raad van Advies, e consehero oficial di Gobierno y Parlamento riba leynan cu mester wordo introduci na Aruba.

Raad van Advies a mustra Mike Eman, cu e no tabata tin base responsabel pa mishi cu BBO sin cu e por a presenta un otro forma cu Aruba lo a haya entrada cu e tabata tin mester pa cubri su gasto.

Na momento cu Mike Eman a gana eleccion na 2009, el a traiciona confiansa di e Pueblo di Aruba pa e haya chens di bira Prome Ministro di e pais, cu intencionalmente el a destrui cu e bahamento di BBO cu mita, cu manera Raad van Advies ta trece dilanti no tabata tin e estudio ni sosten necesario di expertonan financiero.

Mike Eman simpelmente a hunga cu emocion di Aruba y pa cubri e buraco grandi di e mita BBO cu el a introduc, a bay haci un prestamo pa Pueblo di Aruba paga.

E debe nacional a florece den e mannan di traicion y abuso politico di Mike Eman, cu a hunga cu sentimentonan di Aruba na un forma nunca bisto den Reinpo Hulandes.

Na 2013 Mike Eman bou traicion a bolbe hiba Aruba urna electoral, sabiendo cu ya e pais a wordo destrui dor di su maneho y introduccion tambe di e proyectonan Bo Aruba, cu tabata un  fondo di 1.6 Miljard Florin, cu e miembronan di Parlamento di Aruba a entrega Mike Eman y Benny Sevinger pa nan haci y deshaci cu e futuro financiero di Aruba manera tabata kier.

Intencionalmente atrobe Mike Eman a destrui futuro di Aruba cu proyectonan cu mester wordo paga dor di e generacion presente y futuro te cu casi 30 aña y cu a destrui posibilidad pa Aruba por a traha riba e parti di infrastructura importante di e pais.

Na 2013 Aruba no tabata realisa con Mike Eman ya a destrui e pais, manera rapportnan di e tempo y e entrada di Hulanda pa pone Mike Eman y su gobierno bou supervision, a demostra na 2014.

Ora investiga tur rapportnan ta bin topa cu e momento cu Mike Eman ta entrega futuro di Aruba na Nicolas Maduro cu e proyecto Citgo, cu contra ley Mike Eman a negocia.

Prueba di loke DIARIO ta trece dilanti aki den acusacion directo di Mike Eman, cu awe no por scapa e cara cu el a sconde for di eleccion 2017, ta wordo presenta door di DIARIO cu a exigi pa basta tempo pa autoridad financiero duna Aruba tur splicacion riba e herencia cruel di Mike Eman na 2017.

E acusacionnan serio cu Mike Eman a lansa awe pa hunga politica contra e actual gobierno, segun informantenan clave di DIARIO ta bay tin resultado serio pa Aruba na un momento cu Aruba ta lucha pa atrae industria y turismo den pleno pandemia.

Tur cifra di Aruba, tur documento oficial ta duna prueba di e forma cu Mike Eman a destrui Aruba intencionalmente cu su maneho cu a wordo rechasa pa instancianan y conseheronan oficial di Aruba.

DIARIO lo sigui presenta e realidad di Mike Eman na Aruba mescos cu e weganan cu a wordo hunga dor di Gabinete Mike Eman y figuranan manera Benny Sevinger, cu a presta di tranca e rapport di Bo Aruba prome cu eleccion 2017 pa asina evita cu Mike lo a cay mas duro den e proceso electoral 2017 cu tabata e caso.