Logronan di Bucuti & Tara Beach Resort ta un motibo di orguyo pa tur Arubiano

Parlamentario di AVP, Jennifer Arends-Reyes:

ORANJESTAD (AAN) – Den calidad di Presidente di Comision di Turismo den Parlamento di Aruba, Sra Jennifer Arends-Reyes kier felicita di curason e gerencia y empleadonan di Bucuti & Tara Beach Resort pa nan reconocemento internacional como un di e miho resort na mundo.

Segun e Travelers’ Choice Awards 2025 di Tripadvisor, Bucuti & Tara Beach Resort a logra un prestacion sin igual cu a laga su bishitantenan scog’e entre e Top 5 Miho Resort na Mundo, #1 den Caribe, #1 na Aruba y #2 den categoria di “Treat Yourself”.

            Arends-Reyes a enfatisa cu esaki no ta simplemente un premio, sino un testimonio di esfuerso continuo, amor pa excelencia y respet pa tur hende cu ta forma parti di e ekipo. “Bucuti & Tara ta un hotel propiedad y maneha pa un famia local, cu tin un bista cla riba sostenibilidad, medioambiente y bienestar di su empleadonan. E logro aki ta un prueba cla cu turismo por ta humano, eco-responsabel y exitoso na nivel mundial,” Arends-Reyes a bisa.

            E resort, conoci como un pionero den turismo sostenibel, ta sirbi como un ehempel pa tur sector turistico, demostrando cu responsabilidad ambiental y prosperidad humano por bay man den man.

“Como Presidente di e Comision di Turismo mi ta sumamente orguyoso pa mira un empresa local logra e nivel halto aki di excelencia. E echo cu Tripadvisor, un di e plataformanan turistico mas influyente, a otorga e premio aki basa riba experiencia real di bishitantenan, ta pone mas peso riba e merito. E ta un inspiracion pa nos pais,” e parlamentario a agrega.

            Arends-Reyes a expresa su gradicimento pa e invitacion pa asisti na e celebracion di e logro importante hunto cu gerencia y personal di Bucuti & Tara. “Tabata un honor pa ta presente, pa mira e alegria y e orguyo den nan wowo. Esaki ta loke turismo berdaderamente ta: hende cu pasion y dedicacion na e destino cu nan ta sirbi.”