Integridad ta hopi importante pero ta bay tuma su tempo pa trece na un standard  hopi halto na Aruba

Parlamentario Kamperveen fraccion RAIZ:

• Awe ta dia mundial di Anti-corupcion

ORANJESTAD (AAN)- Manera ta conoci, Minister Ursell Arends a declara e siman aki como “Siman di Integridad” den e contexto di Nacionnan Uni, cu ta observa awe Dia 9 di December, e Dia Mundial di Anti-corupcion.

Riba e tema di Integridad, DIARIO a entrevista Parlamentario Raymond Kamperveen, ken a comparti su punto di bista di integridad aki na Aruba. Kamperveen a relata cu algo cu ta existi den e Partido Raiz desde cu nan a cuminza campaña, na aña 2017, ta integridad.

   Integridad ta hopi importante pero ta bay tuma su tempo pa trece integridad na un standard hopi halto, aki na Aruba, segun e parlamentario di Raiz, a bisa,

El a señala cu integridad ta cuminza na cada ken, y Aruba tin un cultura diferente cu aworaki mester bay adapta na kico ta integridad.

   Kamperveen a bisa cu honestidad y integridad ta dos cos diferente. Pa loke ta trata departamentonan, gobierno, politiconan, sirbido publico, ta hopi importante pa haci nan trabao segun nan consenshi y curazon, pero cu integridad, y “en realidad e ta bay tuma su tempo”, e parlamentario a reitera.

“E no ta bay di awe pa mañan cu por cambia tur cos y tur hende ta bira integro, e ta bay tuma su tempo pasobra tur hende tin cu adapta na e sistema nobo aki”, Kamperveen a bisa.

   “Mi ta kere cu mester tin cierto sistemanan in place, por ehemplo data, ora di traha cu sistemanan cu por ‘volg’ cierto cosnan. Ken ta haci ki transaccion, etc. Ta importante pa tin esey ‘in place’ pa e ora ey por cuminza controla persona y sistemanan cu ta duna servicio. Y hopi importante, cuminza duna e lesnan di kico ta integridad pa nos por compronde. Nos tur ta papia di integridad, pero kico e ta?”, e parlamentario a señala.

“Tiki, tiki nos ta educando nos pueblo, nos comunidad y sigur tur nos departamentonan, gobierno y politiconan aki na Aruba” e parlamentario a acentua.

Kamperveen a reitera cu integridad ta keda na cada empleado publico, y e tin entendi cu loke a bira “Integriteit Aruba” ta bezig un par di aña caba, drentando e departamentonan di gobierno, educando e sirbido di pueblo, e ambtenaar. “Mi ta kere cu ta hopi importante pa sigui riba dje, pa no stop. Cada vez cu un hende drenta nobo, ta importante pa educa nan tocante integridad. Kico ta e responsabilidad cu ne y kico ta e consecuencia ora e faya integridad den su trabao”, e parlamentario a bisa.

Segun Kamperveen, Aruba su cultura y su pensamento ta “si mi ta haci bo un fabor bo tin cu haci mi un fabor back. Esey ta biba den nos, pero nos mester duna e miho servicio, corectamente y sin pidi nada a cambio. Esey ta loke mester cambia tiki, tiki,  pa nos departamentonan por eleva, prome cu tur cos nan servicio, y esey ta hopi importante pasobra tin caminda cu nos hendenan ta disgusta servicio cu no ta na e nivel cu mester ta.