Frans Ponson, presidente di CUA ta expresa:
- Si berdad e kier yuda su pueblo
ORANJESTAD (AAN)-- Frans Ponson, Presidente di Comerciantenan Uni Aruba (CUA), den conferencia di prensa a expresa tocante e negoshi di gasoline, cu ironia ta cu e retails cu ta tur gasoline stations, cu no tin monopolio, solamente mag gana 7.3% so, segun datonan cu CUA a ricibi di Economische Zaken mes.
“Kiermen, e comerciante por gana 7.3% so pasobra ‘Gobierno ta cuida e pueblo’. E problema ta cu Gobierno ta cuida e pueblo den e cas di e comerciante, pasobra e ta bisa e comerciante ‘abo’n por gana. E ora ey Gobierno mes ta gana 40 %, el a lubida e pueblo!
“Coy e canasta basico: ‘nos kier bin cu canasta basico pasobra nos kier cuida e pueblo’ e ora ey e wholesales ta gana 12% pero ironia ta cu den nan mesun cas nan no ta cuida e pueblo, pasobra nan si ta gana”, segun Frans Ponson.
E ta cuestiona cu gobierno ta bisa cu nan ta subsidia gasoline un tiki. Pero tempo cu prijs di gasoline a baha nan a subi, duplica, e accijns aki masha hopi mes. “Esey tambe nan a lubida di bisa, y mi ta recorda nan awe. E ta bunita pa papia di surplus; mi kier bisa un cos y por ta hendenan no ta kere: ora un prijs subi na Aruba, ken ta esunnan cu ta gana mas placa? Gobierno mes, pasobra pa mi duna un otro ehemplo aki. Nan ta bisa cu nan a baha 10 cen. Dos stap di BBO cu nos a prueba awe, na momentonan aki riba dos florin, ta 28 cen. E mesun dos stap di BBO riba tres florin ta 42 cen. Kiermen nan ta gana cada bez cu prijs subi. Nos a compronde caba cu otro siman, nan kier subi prijs riba tres florin riba gasoline (Afl. 3.15), ken ta bay gana mas placa? Pasobra p’e porcentahe di dos BBO ta mas nan ta gana!” Ponson a señala, agregando cu Gobierno kier culpa e comerciante tur ora. “Bisando esaki, mi ta kere cu gobierno mester stop di hunga Sinterklaas den cas di otro hende, si bo kier yuda e pueblo, pasobra no tin un canasta basico na bo mesun prijs mas, miho bo ta Sinterklaas den bo mesun cas, prome cu bo bay pafo, anto nos kier subi prijs pafo y Gobierno ta gana mas placa na BBO pero den su mesun cas e ta lubida di wak e prijs aki cu e por baha, pasobra si wak e dividendo cu gobierno ta coi di tur e companianan estatal aki, unda ni competencia tin, djis no ta cuadra pa señala e comerciantenan henter ora, pero nan ta sigui subi’e pa comercio, ta subi e bestaansminimum, e minimum loon, y haci tur e coi loconan aki, sin studia di berdad ken nos mester yuda, y no yuda pa loco”, segun Presidente di CUA Frans Ponson.
