Parlamentario Jennifer Arends-Reyes:
ORANJESTAD (AAN):E proyectonan inclui den e presupuesto 2026–2027 di Algemeen Investerings- en Ontwikkelingsfonds (AIOF) ta habri caminda pa inversionnan den enseñansa, bario, infrastructura, siguridad y servicio publico. Durante rueda di prensa, parlamentario y lider di Fraccion AVP, Jennifer Arends-Reyes, a enfatisa cu e balor di e fondo ta den e mehoracionnan concreto cu e por trece pa Aruba y su pueblo.
“Pa nos, e importancia di AIOF ta den loke e por logra pa e ciudadano: un mucha cu ta haya les den un scol den miho condicion, un famia cu ta mira su bario mehora y un comunidad cu por conta riba infrastructura y servicio publico mas eficiente. Esey ta e resultado cu nos kier mira,” Arends-Reyes a expresa.
Den e area di enseñansa, e proyectonan ta inclui renobacion di Reina Beatrix School y dos lokaal pa SVGA pa por brinda les na nivel di scol secundario. Arends-Reyes a señala cu inversion den espacionan escolar ta contribui na e condicionnan den cual muchanan ta siña y maestronan ta eherce nan labor. Un ambiente adecua ta esencial pa sostene e desaroyo di alumnonan y e trabou diario den scol.
E presupuesto tambe ta contempla mehoracion y embeyecemento di e barionan di FCCA na De Vuyst y Bushiri, ademas di inversion den MFA San Nicolas. E proyectonan aki ta dirigi na mehora e ambiente den bario y e facilidadnan pa encuentro y actividad comunitario.
Pa loke ta trata camindanan, ta contempla asfaltamento di camindanan di tera existente y un plan di mantencion pa varios aña. Segun Arends-Reyes, e inversion inicial mester ta compaña pa planificacion y mantencion continuo, pa e mehoracionnan por dura y e comunidad por sigui beneficia di nan.
Riba tereno di medio ambiente, e lista ta inclui e segundo proyecto di capping na Parkietenbos. Den siguridad y servicio publico, ta contempla reemplaso di vehiculonan y makinaria di DOW.
Arends-Reyes a subraya cu e ehecucion di e proyectonan ta rekeri siguimento constante y informacion cla tocante fecha di inicio, progreso di trabou, gastonan y resultadonan. Pa e lider di fraccion, esaki ta necesario pa pueblo por evalua con e recursonan ta wordo uza y ki mehoracion nan ta trece.
“Nos pueblo mester por mira con e inversionnan ta avanza y con nan ta contribui na su bida diario. Como Fraccion AVP, nos lo sigui haci pregunta y duna siguimento pa e recursonan ta wordo uza cu responsabilidad. Nos compromiso ta cu proyectonan cu ta produci resultado concreto pa Aruba,” Arends-Reyes a conclui.
