Gobierno AVP-Futuro no a sigui conseho di Raad van State riba Ley di Consenso di Reino

Parlamentario Dangui Oduber:

ORANJESTAD (AAN): Tur Parlamentario di Aruba cu a bay Den Haag, a haya tende esaki cu nan mesun oreanan.  Raad van State a duna un conseho den cuadro di funciamento di 70 aña Statuut den Reino Hulandes. Ora nan a trata e tema di consensusrijkswet nan a conseha e procedura cu un gevolmachtigde minister mester sigui prome cu presenta cualkier proposicion di un rijkswet na conseho di minister di reino.

   Raad van State a bisa cu PROME cu e gevolmachtigde minister presenta un ‘’VOORSTEL’’ di un rijkswet, e gobierno MESTER presenta e voorstel aki na Parlamento prome cu presenta e voorstel di e rijkswet na conseho di minister di reino.

   Ta obvio cu e gobierno di AVP-Futuro a viola e conseho aki, e no a sigui e conseho aki y NO kier tabata transparente cu Parlamento di Aruba y nos pueblo. Ta un berguensa ora nos scucha miembronan di parlamento papia di e rijkswet Hofa aki.

   Ta condenabel cu e gobierno aki pa un tema asina sensitivo cu ta entrega di nos autonomia financiero y libertad NO a sigui e procedura prescribi y tampoco a sigui conseho di Raad van State. E gobierno aki e demostra di ta un gobierno anti democratico, no transparente y cu no ta sigui e procedura manera mester ta. Na e momentonan aki gobierno di Aruba tin un surplus di 500 miyon Florin, nos tin supervision financiero desde 2014, nos ta cumpliendo cu tur nos normanan financiero y ta cumpliendo cu nos debe cu Hulanda a pie de la letra! Es mas segun proyecionan di gobierno, pagando e strafrente di 6.9% nos debe te baha na 50% na aña 2030 caba!

   Awor ta importante pa gobierno y su parlamentarionan splica pueblo kico ta e necesidad y kico ta urgencia pa bay di acuerdo cu e rijkswet HOFA cu no ta nada otro cu entrega di nos Libertad, entrega di nos autonomia financiero, entrega di nos derecho di autodeterminacion y entrega di Parlamento.

   Rijkswet HOFA ta kita derecho di parlamento: Esaki ta e consecuencianan di e Rijkswet HOFA pa nos Libertad y autonomia financiero: E rijkswet HOFA Ta duna Hulanda e autoridad pa dicidi con Aruba mag di gasta su propio placa.

   Desde cuando un banco cu ta prestabo placa por dicidi pabo con abo mag gasta bo propio entrada? E rijkswet HOFA ta duna Hulanda e autoridad pa dicidi cuanto placa Aruba mag di fia!

    Ley ta coba hopi hundo: E ta un ley cu ta bay hopi mas leu cu solamente controla. Pa cada inversion sea chikito of grandi mester pidi PERMISO na Conseho di minister di Reino (gobierno di Hulanda). Desde aña 1986 pais Aruba ta dicidi riba tur inversion, cu HOFA esaki lo cambia! Pa cada cambio den presupuesto mester pidi Hulanda permiso pa haci cambio!

   Esaki ta puntonan cu nos mester informa comunidad pakico nos ta considera e rjkswet HOFA como entrega di nos Libertad y entrega di nos autonomia. Nos ta lamenta cu den parlamento tin miembronan cu no ta sinti nada pa nos Libertad, nan no ta sinti nada di orguyo di por ta biba den un pais liber, nan no ta sinti nada pa nos Status Aparte. Ni con chikito un nacion ta, semper bo mester para firme y fuerte pa bo principionan y dignidad!

   E politico Arubiano cu kier entrega nos Libertad y ta di acuerdo cu Rijkswet Hofa NO ta sirbi interes di pais Aruba sino ta sirbi sea su propio interes of un otro interes pero no interes di nos bienestar y Libertad.

   Libertad di un pais NO tin prijs y pa un sakito di placa nos no por permiti pa Mike Eman, Gerlien Croes y Geoffrey Wever ta bende nos alma y Libertad!

   Nos accion di firma ta continua pasobra ta voz di pueblo, rosea cayente so por para e Rijkswet HOFA aki!