Gerlien Croes a lansa oficialmente Partido TUR

Presentacion oficial di FuTURo

ORANJESTAD (AAN): Diadomingo anochi na Casibari, un cantidad di invitao tabata presente pa asina presencia e momento cu tabatin e lansamento oficial di Partido TUR.  Su nomber mes ta FuTURo, un partido politico dinamico dirigi pa Gerlien Croes.

   FuTURo, cu ya ta registra pa participa den e proximo eleccion, ta comprometi na trece cambio positivo pa e pueblo di Aruba a traves di su balornan fundamental di Transparencia, Union y Representacion.

   FuTURo ta mas cu djis un partido politico. Su mision ta pa fortifica e individuo y sirbi e comunidad, door di crea oportunidad pa tur ciudadano por avansa. E liderazgo di e partido ta pone como prioridad un maneho solido y responsabel cu ta pone enfasis riba cooperacion, ta encurasha solucionnan innovativo y ta fomenta crecemento inclusivo pa e bienestar di e isla.

   E anuncio a bin durante un encuentro diadomingo atardi na Casibari Rock Formation den districto di Paradera, caminda Croes a ofrece detaye na tur esunnan cu a bin presencia e momento transcendental aki den historia. Mescos cu famia, amistad y sostenedonan cu a compañ’e, lider di FuTURo a refleha un optimismo contagioso y a afirma di ta cla, no solamente pa e reto di un eleccion adelanta, pero mas ainda, pa guia Aruba den un rumbo mas prometedor pa tur.

   “Den FuTURo, nos ta kere cu cada Arubiano merece di biba den un sociedad caminda oportunidad igual y solidaridad ta forma e fundeshi di nos comunidad,” asina Gerlien Croes, lider di partido FuTURo a expresa. “Nos vision ta pa construi un futuro caminda prosperidad y felicidad no ta djis aspiracion, pero realidad pa tur.”

FuTURo su mision ta uno cla: lidera Aruba cu integridad y proposito, sigurando cu e bos di e pueblo ta scucha y nan tin loke nan mester E partido ta busca pa promove bienestar y oportunidad igual pa tur ciudadano, enfoca riba desaroyo sostenibel, maneho inclusivo y gobernacion transparente. FuTURo su filosofia ta cu trahando hunto, Aruba por alcansa un futuro miho y mas uni.

    Segun Gerlien, e balornan Principal di FuTURo ta: (1) Transparencia: Gobernacion habri y honesto cu ta crea confianza entre e pueblo y su lidernan.  (2) Union: Trece hende hunto pa traha riba metanan comun na beneficio di tur.  (3) Representacion: Sigura cu e bos di cada ciudadano ta scucha y nan interesnan ta representa den e proceso di tuma decision.

   Partido FuTURo ta invita tur ciudadano di Aruba pa uni na e rosea nobo di cambio. Hunto, nos por crea un isla caminda e principionan di igualdad, oportunidad y bienestar no ta djis idealnan, pero e realidad di TUR dia pa TUR hende.