Gabinete Wever-Croes II a cay dialuna mainta

Raiz a kibra acuerdo entre MEP y RAIZ

 *Eleccion ta dia 6 di december

*18 di october mester entrega lista 

ORANJESTAD (AAN):   For di diadomingo anochi tabata scucha diferente version, uno di Partido Movimento Electoral di Pueblo (MEP) cu a reuni na nan cede na Santa Cruz den oranan laat y otro di Partido RAIZ, cu tambe a reuni, relaciona cu algun diferente di opinion entre e coalicion cu ta forma Gabinete Wever-Croes II y cu a conduci na e echo cu dialuna mainta Gobierno di Aruba a cay.

            Dialuna mainta a habri cu un reunion den sala di Parlamento caminda tabata tin votacion pa elegi Presidente di Parlamento pa e proximo periodo y esaki a finalisa na fabor di Raymond Kamperveen.

            E asunto aki di eleccion di e presidente nobo di parlamento y ken lo a vota pa ken a trece cu e situacion a escala. A pesar cu por a mira un Edgard Vrolijk masha trankilo pa loke tabata e proceso di votacion y su posibel reeleccion, na otro banda, RAIZ a para cu nan no lo a sostene Vrolijk pa un otro periodo.

            Tur esaki tin di haber cu e echo cu algun miembro di RAIZ, den e caso aki, Misha Raymond, no a keda mucho contento con e forma con Edgard Vrolijk a manera e reunionnan di matrimonio di mesun sexo.

            Relaciona cu esaki,  Prome Minister Evelyn Wever-Croes acompaña pa coleganan minister, a acudi na Gabinete di Gobernador unda el a declara na prensa cu el a entrega retiro di su gobierno na Gobernador Boekhoudt.

            Esaki ta trece cu ne cu tin un gobierno demisionario y lo atende solamente cu e asuntonan coriente.

            Evelyn Wever-Croes a declara cu e decision aki nan a tum'e door di e partner den coalicion cu a busca aliansa cu oposicion y  kibra e acuerdo entre MEP y RAIZ sin acuerdo n' por tin un gobierno. E acuerdo ta bisa cu MEP ta apunta presidente di Parlamento, RAIZ ta apunta un vicepresidente. E acuerdo ta bisa tambe cu MEP ta apunta su ministernan y RAIZ ta apunta su ministernan.

            Na caminda a haci otro acuerdo cu MEP ta apunta su minister plenipotenciario na Hulanda y RAIZ ta apunta esun na Washington DC.

            El a enfatisa cu stabilidad politico ta hopi importante pa e pais aki y no por wordo determina pa pensamentonan personal.

            Wever-Croes a duna di conoce cu deliberando cu Gobernador a defini cu e fecha pa eleccion lo ta dia 6 di december proximo y e fecha pa entrega lista ta 18 di october.

            El a expresa cu e ta lamenta y ta desapunta  hopi pasobra Aruba ta bayendo bon. "Mi kier sigura tur ciudadano di e pais cu ami y mi coleganan lo sigui traha pa mehora e calidad di bida di tur nos ciudadanonan y trece progreso y bienestar tur caminda maske nos ta demisionario y hunto nos ta bay haci esaki".

            E mandatario a laga sa cu te cu diadomingo atardi, Sr. Ursell Arends no por a bis'e a motibonan di e desconfiansa pa cu Sr. Edgard Vrolijk.

            Dialuna a yama un reunion di Conseho di Minister urgente y Minister Arends n' tabatey, Wever-Croes a indica.

            Pa loke ta eleccion a indica cu campaña pa MEP a cuminsa caba na Juni, pero pa un eleccion riba man nunca ta prepara. Toch ta na tempo y tin un team trahando riba esaki y e no ta preocupa, pero tin cu bay haci hopi den e siguiente dianan.

            A agrega cu nan ta hopi avansa cu e candidatonan, pero e ta bay tuma cambio di plan y strategia debi na e caida di gobierno.