Evelyne Wever Croes a demostra di ta un lider cu por goberna Aruba den lamanan bruto

Minister Dangui Oduber

ORANJESTAD (AAN): Henter Conseho di Partido MEP a demostra confiansa den su Lider cual diadomingo un biaha mas ta keda proclama como e lider di e Partido y e lider pa e siguiente gobernacion. Nos Prome Minister sra. Evelyne Wever Croes a demostra di ta un lider cu por goberna Aruba den lamanan bruto. Un lider cu semper a traha cu determinacion, vision y amor pa su patria.     

            E la lidera nos pais den e peor crisis den Aruba su historia ocasiona pa e pandemia di COVID-19. Aruba a haya su mes den un crisis financiero caminda nos fronteranan tabata cera, no tabata tin turista, beachnan tabata bashi, hendenan no tabata tin entrada. Nos prome minister y lider a no a dobla pero a enfrenta e situacion, negosha y yega na un acuerdo cu Hulanda pa remedia e situacion.          

            Prome cu e pandemia Aruba tabata bayendo pa un surplus den su presupuesto di aña 2020. Niun hende por a kere cu esaki tabata posibel despues cu a hereda un pais practicamente bancarota den un mega debe. Banda di esaki nos lider y prome minister a haye confronta cu e crisis di frontera entre Venezuela y Aruba.            

            Danki na tur esaki pueblo a haci Partido MEP e Partido mas grandi den eleccion di 2021 y duna Evelyne Wever Croes mastanto voto den e ultimo eleccion.

            Actualmente Aruba ta floreciendo un biaha mas, comercio a conoce un cresemento, nos turismo a surpasa tur expectativa y ta premira cu e lo surpasa nivelnan di aña 2019. Nos hendenan tin trabou, nos tin un gobernacion stabiel y e recuperacion ta wordo sinti den tur hogar.

            Ami Minister Dangui Oduber di Partido MEP ta sumamente orguyoso di su Lider cu a demostra cu e por a lidera partido y pais den bon tempo y den tempo dificil.