Edgard Vrolijk eligi como President di Staten

Ursell Arends ta Vice-Presidente - ORANJESTAD (AAN): Diahuebs despues cu e 20 Parlamentarionan nobo a huramenta, a escoge Mervin Wyatt-Ras pa temporalmente guia e reunion di Staten, unda ta bay eligi un President y Vice-President nobo.

   Pa esaki a forma un comision cu ta consisti di presidente Marisol Lopez-Tromp (MAS), y tambe Evelyn Wever-Croes (MEP), y Gerlien Croes (AVP).

   Di e forma ey tur miembro di Parlamento a vota y pone 2 nomber pa bay pa Presidente di Staten, y 2 nomber pa Vice-Presidente di Staten.

   Como presidente di Staten a keda eligi Edgard Vrolijk cu 11 voto pro.  E otro candidato tabata Marisol Lopez-Tromp cu 9 voto.

   Debi cu tin di manda 2 nomber pa Gobernador, e segundo nomber escogi ta Hendrik Tevreden cu 9 voto.  E demas cu a haya voto ta Miguel Mansur (8 voto), Ursell Arends (2 voto), y Gerlien Croes (1 voto).

   Como Vice-president di Staten a keda eligi Ursell Arends cu 11 voto.  E otro candidato tabata Gerlien Croes cu a haya 9 voto.

   Debi cu tin di manda 2 nomber pa Gobernador, pa Vice-Presidente e segundo nomber escogi ta Geoffrey Wever cu 11 voto.  E otro candidato tabata Miguel Mansur cu 9 voto.