‘E planta na Bubali ta un bom wardando pa explota’

Parlamentario Xiomara Maduro:

• Ni AVP ni Futuro no a sostene mocion riba e asunto 

ORANJESTAD (AAN): Parlamentario Xiomara Maduro di MEP, a splica cu durante e reunion publico reciente tocante e situacion di AWSS (Aruba Wastewater Sustainable Solutions), a bira bisto cu Aruba ta core un riesgo serio cu no por wordo ignora. Minister Dowers, responsabel pa e compania estatal AWSS, lamentablemente a demostra cu ainda no tin un plan concreto ni sostenibel pa atende cu e problema urgente di tratamento di awa residual.

    Situacion Critico: AWSS ta e entidad cu desde aña 2024 ta encarga cu e tratamento y maneho di awa residual na Aruba. Nan trabao principal ta purifica awa uza, preveni contaminacion ambiental y proteha salubridad publico. E planta di tratamento na Bubali, un di e infrastructuranan mas critico di nos pais, ta funcional ya pa varios decada, pero awor ta wordo considera anticua y incapaz pa cumpli cu e demanda actual y di futuro.

   Durante e reunion Fraccion di MEP a presenta un mocion pa destaca cu: (*) E planta di Bubali ta bieu y no ta cumpli cu e capacidad necesario pa Aruba. (*) Tin problema continuo di holo desagradabel y descarga di awa cu calidad insuficiente den lama. (*) Tin un riesgo real di fayo den e instalacionnan. (*) Desde 2017 a haci gasto significativo, pero mayoria tabata pa solucion temporal.  (*) Na 2022 a presenta un plan integral cu participacion di Royal HaskoningDHV, pero nunca a wordo implementa. (*) Falta di accion ta aumenta e riesgo pa daño ambiental, economico y salud publico.

    E mocion tambe a pidi pa gobierno:

- Dentro di 6 siman, presenta un plan integral, concreto y sostenibel pa e planta na Bubali;

- Basa e plan riba e estudio existente of presenta un alternativa igual of miho;

- Duna claridad riba financiamiento, fase di ehecucion y maneho di riesgo.

   Lamentablemente, e mocion aki no a haya apoyo di parlamentarionan di AVP y Futuro. Nan a vota contra, siendo cu e urgencia di e situacion ta evidente, ya cu e planta na Bubali por wordo considera “un bom wardando pa explota”, cu potencial impacto serio riba nos turismo, medio ambiente, salud publico y economia en general.

   Ta hopi lamentable cu Minister Dowers no a presenta un plan concreto ni direccion strategico pa AWSS. E decision di coalicion pa rechasa e mocion ta mustra falta di seriedad y compromiso cu solucionnan real.

   “Nos ta haci un yamado urgente pa Minister Dowers y AWSS actua lihe y presenta un plan sostenibel. Aruba no por sigui depende di solucion temporal mientras e problema ta sigui crece,” Maduro ta expresa.