AVP ta sinti cu Ministro ta tene Busnan chikito ta sigui sufri na liña

ORANJESTAD (AAN): Segun Partido AVP, nan a scucha hopi chauffeur di Bus chikito.

E impacto di aumento di prijs di diesel y gasolin tin nan sofoca. Hopi di chauffeurnan ta subi caminda di 5:30’or di marduga y ta traha te cu 6’or di atardi pa por sera un entrada margina cu e aumento drastico di prijs di gasoline y diesel.

   Awor AVP a reacciona riba e carta di Minister Ursell Arends cu e ta bay “evalua” e situacion di e autobusnan y “alrededor di 3 pa 4 luna” nan lo haya un contesta.

   Segun AVP, den e carta tin dos componente cu ta mustra cu e Minister no ta husto tampoco sincero cu e Autobusnan. E promer ta cu e ta bisa cu e ta bay “evalua” e situacion. Ta kico mas tin pa evalua si e prijs di diesel, cu ta e costo primoridial diario di autobusnan, a bay di 1.95 na januari pa 3.12 na juli 2022. Un autobus ta gasta entre 100 Florin pa 125 Florin riba un dia na diesel, anto esaki ta mitar tanki.

   Partido berde kier sa si acaso ta asina dificill pa Ursell por calcula ta cuanto buelta un autobus cu ta carga 11 pasahero (si e ta yen) tin cu tira pa simplemente por paga pa e diesel, promer cu por cuminsa yega na un entrada.

  Y esey sin tuma na consideracion cu pa e chauffeur di autobus y su famia tambe e aumento dramatico di costo bida ta pisa hopi mes. Corda tambe pago di e bus y mantencion.

   AVP a mustra cu e di dos aspecto inhusto y insincero di e carta di Minister Ursell Arends ta cu e ta bisa cu lo tuma “alededor di 3 pa 4 luna” pa keda cla cu un “evaluacion”. Esaki simplemente ta un mentira. Un situacion asina evidente di sufrimento no mester tanto luna pa dicidi riba dje. Ta bisto cu simplemente kier tene e autobusnan na liña.  AVP ta haya esaki algo hopi penoso mes.

   E fraccion a papia cu chaueffeur di Busnan chikito cu ta core henter dia, comiendo na stuur, pa por sobrebibi.

   AVP ta convenci cu Gobierno tin un responsabildad pa cu e aumentonan grandi den prijs di gasoline y diesel. door di a redobla e BBO di 3% pa 6% y a kita e descuento di 10 cent pa liter di gasoline y diesel a haci e costo y aumentonan ainda mas severo cu nan ta caba.  Den hopi pais gobiernonan ta asumi un responsabilidad pa crea un alivio cu reduccionan di impuesto pa cu gasoline y diesel.

   Na Aruba no a mira ningun intencion di Gabinete Wever Croes pa crea un alivio.