Lider di MEP Evelyn Wever-Croes:
*“Mi no ta compronde dicon oposicion tin tanto envidia”
ORANJESTAD (AAN): Recientemente durante e debate di Presupuesto Supletorio 2024 den Parlamento, mas di un parlamentario a cuestiona e echo cu Lider di nos Partido y Prome Minister di Aruba Evelyn Wever-Croes ta practica arte den su tempo liber. Esaki nan a trece dilanti na un forma denigrante y Partido MEP ta considera esey como un muestra di nan ignorancia riba e tipo di practica aki.
Ignorancia, den e sentido corecto di e palabra, esta e echo di no sa di algo, ta un escogencia, no un condicion natural. Tin hende ta scoge pa no tin conocemento di arte pasobra kisas nan no tin interes of no ta tuma e tempo pa dedica nan mes pa siña tocante arte na e mesun manera cu si nan ta scoge e tempo pa gasta criticando otro.
“Ami ta uza arte como forma di relaha y recarga energia. Tambe arte ta mantene un balansa entre e cantidad di trabou y e presion di mi trabou. Varios biaha mi pinturanan ta resulta den algo bunita, y otro biaha no, pero e libertad di haci un eror cu arte ta loke ta crea e libertad di creatividad y innova”, Lider di MEP a expresa.
Pa Partido MEP, e rabia cu Parlamentarionan Gerlien Croes, Mike Eman y Marisol Tromp ta mustra pa arte di Evelyn Wever-Croes, ta incomprendibel y tambe esaki ta un falta di respet pa e artistanan local cu ta practica arte. Pa aprecia arte, e ta rekeri un cambio den bo percepcion, y por ta e parlamentarionan aki no ta habri pa expande nan percepcion, nan ta simpel y mentalmente floho of demasiado negativo pa haci esaki,
“Actualmente e tema di salud mental ta hopi den discusion y cada un di nos, como mandatarionan cu mester duna ehempel, tin e responsabilidad di busca den nos mes kico ta yuda nos mantene nos salud mental na un bon nivel. Arte ta yuda ami cu esey y p’esey mi kier comparti esaki pa por yuda otro cu kisas tambe lo por scoge arte como e manera di relaha. P’esey mi ta duna tanto publicidad na e arte cu mi ta haci. No pasobra mi ta un artista, no pasobra mi ta un profesional y mi no ta kere cu mi tin e talento ey tampoco pa biba di arte. Pero mi ta haya importante pa comparti’e pa yuda otro hende”, Lider di MEP a enfatisa.
Lider di MEP a remarca cu otro motibo hopi importante tambe ta cu e ta sostene artistanan na Aruba cu tin cu lucha hopi duro pa nan arte wordo reconoci y aprecia. Sigur e artistanan cu ta biba di arte ya cu e ta un trabou cu ta dificil pa biba di dje, y publicando su arte ta su forma di sostene nos artistanan local.
Lider di MEP a expresa cu e ta lamenta cu e parlamentarionan aki ta asina envidioso y negativo riba algo asina bunita como sifuera nan ta kere cu Lider di MEP kier molestia nan cu su arte, cual no ta e caso. “Alcontrario, mi ta haci’e pa yuda esnan cu mi por yuda pasobra ta p’esey ami a drenta politica, pa mi yuda, pa mi ta un ehempel y ohala un inspiracion”, Evelyn Wever-Croes a duna di conoce.
Lider di MEP un biaha mas ta gradici nos artistanan local y esnan cu ta duna les di arte, pa e trabou grandi cu nan ta haci. Realmente nan ta haciendo un diferencia den nos comunidad.
