Cuerpo Policial a informa
*E di 11 accidente fatal den trafico pa 2025
ORANJESTAD (AAN): Dialuna pasa DIARIO a publica un update relaciona cu otro caso serio di Hit & Run cu a socede na final di December cu a pasa. Diasabra 27 december 2025 pa 8’or di anochi Central di Polis a wordo notifica cu un accidente a tuma lugar den Caya Musica, direccion panort pa Bubali.
Un auto lo mester a alcansa 2 hende muher y nan ta mustra gravemente herida.
Central di Polis ta despacha patruya di polis como tambe ambulance na e sitio di e sucedido.
Na yegada di polis a bin topa enberdad cu dos hende muher riba caminda y nan situacion tabata mustra grave. E auto cu a dal e victimanan a bandona e sitio di e sucedido. Testigonan eybanda a splica cu nan a tende un golpi y ora di bira nan cara, a mira con e dos damanan aki tabata wordo “gezwaai” den halto y cay pariba den e pida cu yerba. Nan a mira cu no ta un auto, sino ta un vehiculo tipo Pickup color preto, cu no a ni stop y a djis sigui core bay nort direccion di e rotonde di Bubali banda di Bubali Food Center.
Ambulance a yega na e lugar y a duna asistencia medico na e dos victimanan, cu ta turista nacionalidad Mericano. A stabilisanan y bay cu nan cu maximo urgencia pa Hospital (HOH).
Specialista di trafico a presenta como tambe polis tecnico pa asina haci nan investigacion.
Un di e victimanan su situacion tabata hopi critico y a keda interna den ICU.
E siman aki mes, un di e victimanan, Michelle Rodriguez a duna su relato di loke e y su mama a pasa aden, na unda el a conta cu nan tabata na caminda pa bay supermercado y a haya nan mes envolvi den un Hit & Run.
Un di e victimanan ainda tabata interna den cuido intensivo cu un herida cerebral traumatico, nuebe ribchi kibra, y un pulmon a colapse. Pa motibo di e situacion critico aki, nan a spera cu e gastonan medico lo ta hopi halto y a cuminsa un GoFundMe pa cubri parti di e gastonan aki. Te cu diamars nan a recauda un total di 23.614 dollar.
-Polis a duna un update
Diamars 13 januari 2026 pa mas o menos 1’or merdia polis ta wordo notifica door di personal di hospital cu e victima a fayece.
Dokter ta constata morto di e señora turista Lisa Marie Barnett naci 26 oktober 1968 (57aña) na Merca.
E ta bira e di 11 morto den trafico pa aña 2025. Segun vocero di Polis, señora Liliana Rasmijn, esaki ta motibo cu e accidente a pasa den aña 2025.
DIARIO y Cuerpo Policial ta manda palabra di condolencia na famia di e fayecido.
Cuerpo Policial ta haci un apelacion na e personanan cu sa algo of a wak algo pa yama e tiplijn di polis cu ta 11141. Bo ta keda anonimo.
Na e chauffeur di e auto cu a dal e personanan y bandona e sitio “ hit and run” ta haci un apelacion na dje pa para responsabel pa bo acto cometi y presenta na Warda di Polis.
