Vehiculo a dal peaton femenino cruzando WVB Boulevard na forma peligroso

ORANJESTAD (AAN): Diabierna anochi Central di Polis a core manda unidad policial di Playa riba e caminda di WVB Boulevard Zuid,

na otro banda di caminda di Aurora Funeral Home, unda auto a dal un peaton.

   Polis a yega y nota cu no ta trata di un auto, sino un vehiculo tipo SUV esta un Kia Seltos color shinishi scur cu number A-935 para banda pabao di e caminda cu ta bay zuid.  Abao riba caminda tabatin un peaton femenino cu basta golpi na su curpa.

   Ambulance tambe a yega rapido aki, y mesora a cuminza atende e peaton pa asina stabiliza su situacion.  Pero tabata bisto cu nan tin di bay cune rapido pa Servicio di Emergencia di Dr. Horacio Oduber Hospital pa atende.

   Polisnan a guia trafico un momento pa asina e fluho no stagna.  E chauffeur di e Kia Seltos a informa Polis cu e ta bayendo zuid y inespera e peaton a cruza caya y no por a haci mucho.  Cu e banda robez di e bumper y wantalodo dilanti a dal e peaton.

   E chauffeur tabatin tur documento na regla y a keda eynan wardando riba Specialista di Trafico pa investiga e accident.  Pero hecho ta cu eynan no tin ningun zebrapad pa cruza caya, debi cu simplememte e no ta un lugar pa cruza.  Pero hopi biaha bo ta mira hende ta trece nan mesun bida na peligro, ta subi y baha e separador mey-mey.  Pasobra pa ley bo tin di bay te na e rotonde di Cumana pa cruza bay otro banda.

   Pues esaki ta un lugar peligroso pa crusa y mester ta sumamente cauteloso.