Turista Mericano di 39 aña a fayece ora di cay cu Quadracer den buraco di algun meter hundo

Accident fatal durante un ATV Tour

ORANJESTAD (AAN): Diabierna merdia alrededor di 12:30 pm, yamadanan urgente a cuminza drenta na autoridadnan, pa mustra cu algo serio a caba di socede na costa panort di Aruba.

   Tur yamada tabata indica cu ta trata di un accident serio, ora cu un vehiculo ATV (yama ‘Quadracer’) a sufri un accident na Boca Indjeco, cu awendia a bira conoci tambe como ‘Blackstone Beach’.

   Mesora a cuminza manda patruyanan di San Nicolas pa Boca Indjeco, y tambe a notifica Centro di Alarma pa manda Ambulans, debi cu a haya informacion adicional cu un di e victimanan a keda gravemente herida, y e momento ey nan a cuminza practica CPR pa e por cuminza hala rosea bek.

   Pero a bin haya sa cu un rato despues, e victima no tabata reacciona mas y no tin señal vital.  E victima a resulta di ta un dama kende a viaha pa Aruba hunto cu grupo femenino pa asina celebra Dia di Mama na Aruba.  Diabierna nan tabata riba un ATV Tour, pues nan tur ta den Quadracers.

   Testigonan a splica cu durante e tour, riba e caminda na altura di Blackstone Beach nan a wordo sorprendi pa un buraco di algun meter hundo, e dama cu tabata na stuur di e Quadracer a logra bula for di e vehiculo ATV na tempo.  Pero lamentablemente esun sinta patras riba e Quadracer no a por a bula for di e vehiculo na tempo y a bay cay cu e aparato den e buraco aki. E victima a haya hopi golpi na pecho.

   Hopi liher nan a logra saca e victima for di e buraco (cu tabata basta hundo), pero e Quadracer si a keda atras den e buraco, considerando cu e ta pisa y ta hopi dificil pa sac'e for di e buraco hundo aki.

   Na Boca Indjeco tabata presente e paramediconan di Ambulance, personal di Brandweer, agentenan policial di team forensico di BFTO, y di departamento di trafico.  Bureau Slachtofferhulp tambe a yega na e lugar pa asisti e amiganan di e fayecido.

Dr.forensico Wemejier ta constata morto di e turista femenino V.M.L. nacionalidad Mericano di 39 aña. 

   E curpa sin bida a wordo transporta den baki di e pickup di Brandweer, for di e lugar di e accident cu tabata te na rand di e costa, te ora cu a yega na Sabanilla Abou, unda e shersh di Funeraria a tuma e curpa, y bay cu ne.

Un tremendo trabao coordina di polis, brandweer y ambulance pa cu rescate pa por a saca e victima. 

Diario y Cuerpo Policial Aruba ta manda palabra di condolencia na famia di e fayecido.