ORANJESTAD (AAN): Diaranson mainta pa 9:50 am, un unidad di Polis di Santa Cruz a bay cu urgencia na Fly ‘N Dive cu ta situa na Bucutiweg como cu riba un boto tin un persona cu no ta halando rosea y nan ta rumbo pa tera eynan.
Ora cu Polis a yega na e Pier den area di Varadero, a nota cu ainda e boto no a drenta. Mientras tanto Paramediconan tambe a yega eynan sperando e boto drenta cu e victima.
Te banda di 10:10 am, e boto a drenta y mara na e Pier. Polisnan a nota cu den e boto tin 2 homber ainda ocupa ta practicando CPR y tratando di reanima e victima.
Paramediconan tambe a bula abordo y a sigui cu nan trabao di CPR, y a pone machine pa vigila pulso di e victima.
Mientras tanto Polis a papia cu e capitan di inicial H.S., y tambe cu e Dive-Master di inicial S. y nan a duna informacion na agentenan. Polis a pidi pa Bureau Slachtofferhulp tambe bin eynan.
Banda di 10:30 am, paramediconan di Ambulans a stop cu e proceso di CPR, como cu nan no tabata hayando pulso mas di e persona. E ora autoridad a pidi presencia di demas autoridad competente.
Team forensico di BFTO ta yega despues pa asina documenta tur esaki. Docter Teixier tambe a yega eynan, y pa 11:10 am a constata morto di e turista M. di 55 aña naci na Merca. Na su famia ta bay palabranan di condolencia.
