Homber di 72 aña a fayece despues
ORANJSTAD (AAN): Tabata Diasabra atardi cu e calor extremo a pone cu hopi hende a dirigi pa lama pa busca tiki alivio. Pesey mes beach e.o. na Arashi tabata bastante yen di hende den lama, riba santo blanco, y tambe den parkinglot.
Mesun cos por bisa di Boca Catalina, tambe na Tres Trapi cu tambe tabata yen di hende. Diripiente pa 4:05 pm, cu Central di Polis a wordo notifica cu un turista masculino cu ta gozando di un Snorkel Tour riba un Catamaran local, a haya problema den lama.
Polis a haya sa, cu e turista a wordo hisa, y nan ta ocupa ta practicando CPR riba e turista. Mesora Central di Polis a dirigi unidad rumbo pa Boca Catalina, y a informa Centro di Alarma tambe pa dirigi Ambulance.
Despues esnan di Catamaran, a baha e turista den un rubberboat (‘dinghy’), y esaki nan a trece rumbo pa oriya na altura di Boca Catalina.
E prome unidad di Polis cu a yega, a bin topa cu e personal di Catamaran cu a bin na oriya cu e victima. Ainda nan tabata haciendo CPR riba e persona, y e oficialnan di Polis tambe a yuda cu e proceso di trata na reanima e victima. Ora cu Ambulance a yega, e Paramediconan tambe a tuma over y a pone sensornan na su curpa pa vigila su curason.
Pero aki a bin nota cu ya caba e turista masculino no tin señal vital mas. A informa autoridad cu nan no por haci nada mas, y a pidi pa presencia di Docter.
Asina Docter Texier a yega na e lugar, y el a constata morto di e turista masculino di 72 aña naci na Spaña.
A manda busca presencia di Bureau Slachtofferhulp tambe pa brinda asistencia na famia den e momento dificil ey.
DIARIO y Cuerpo Policial ta manda palabra di condolencia na famia.
