Presidente di Sindicato di Polis, Rodney Solognier, cu relato amplio:
*E trabao aki na Cumana lo wordo financia pa APFA
*Ta trata aki di un proyecto comercial segun SPA por a compronde
ORANJESTAD (AAN) President di Sindicato di Polis (SPA), señor Rodney Solognier, den entrevista cu Matutino DIARIO, a confirma cu hopi cos ta draai rond di e proyecto cu gobierno anterior tabata tin, di traha e warda di polis den e edificio ex-Codemsa na Cumana, pero tin hopi reto cu ne y e sindicato a trece esaki dilanti cu Minister di Husticia, y e tin entendi cu e plan a cambia por completo y e gastonan envolvi lo no ta di Gobierno sino di APFA, dus e ta keda un negoshi pasobra APFA ta un negoshi, y en todo caso no ta Polis so ta bin eynan sino hopi departamento cu no ta, absolutamente, di gobierno.
“Pero mi tin cu bisa, sinceramente, cu hopi cos no ta cuadra mas, cu loke nos tabata pensa antes. Cosnan ta cambia, prijsnan ta subi, y esey ta trece segun mi por a compronde, cu gobierno mester revalua e sistema completo, pa wak si ta factible si, of no”, Solognier a duna di conoce.
El a agrega cu, logicamente, como cu SPA no tin mucho informacion mas riba e tema aki, nan a trece nan preocupacion dilanti pasobra ora bo ta wordo priminti cierto cosnan, bo ta na spera cu e promesanan ey ta wordo cumpli. “Pero eigenlijk, m’a bin compronde, na ultimo, cu: “Nos tin cu bay bek na e plannan prome y haci un reconstruccion di full e structura di e luga p’asina haci un miho adaptacion di dje”. Solognier a splica cu full den detaye e lo mester a bay haci un onderzoek di e aspecto financiero cual no ta parti di SPA. “Pero si mi por bisa cu e intencion di Codemsa ta pa tin un lugar central pa polis, y eynan pone diferente departamento, no solamente Warda di Polis, p’asina ey nan joint venture hunto, p’asina ey baha e gastonan cu nan tin rond di e edificionan cu no ta di gobierno at all. “Den e caso aki, tampoco ta di gobierno, pero ta di APFA. Pero di un manera of otro por bisa, bo por bisa cu nan ta bay hink’e den e mesun inversion, di gobierno mes” Solognier a declara.
El a subraya cu e ta keda un “business, pasobra APFA ta un business”, pero e ta keda mesun cas. Pero e intencion ta pa ubica yen di departamento den e lugar ey. “Mi a compronde cu hasta nan tin plannan pa traha full un edificio nobo na banda. Pakico? Esey si, te ainda mi no sa; esey ta e ultimo update cu mi tabata tin. Pero mi a bisa atrobe, gobierno actual kier bay haci full un planning nobo pa e sitio di Codemsa. Full un planning nobo riba mapa, etc. Cambio di Oficina, kita esaki, pon’esaya, etc., etc,. pa pon’e mas factible, pa locual den futuro lo mester bay paga”, Presidente di SPA, Rodney Solognier a señala.
