Turista di edad grandi a hoga na De Palm Island

Diadomingo merdia

ORANJESTAD (AAN): Un momento di panico, y tambe movimento rapido di trahadornan na De Palm Island, pa busca tur forma pa brinda asistencia na un bishitante cu posiblemente a bira malo den lama.

   Tabata banda di 1:10 pm, cu Central di Polis a ricibi informacion for di Centro di Alarma, cu un persona masculino di edad grandi a guli hopi awa den lama na De Palm Island, y cu nan a sak’e di awa, y ta bayendo rumbo pa Pier na tera, y ta solicitando Polis y Ambulans.

   Mesora unidad di Polis a mobilisa pa e area, y na yegada na e Pier cerca di e Ticket Office di De Palm Island, a bin nota cu ya caba a trece e turista, y cu dos unidad di Ambulans presete.  Paramediconan tabata atende e turista masculino, y a pone mashin na su curpa, y ta practicando CPR.

   Sinembargo despues di varios momento ta tratando di reanima e persona, indicacion a mustra cu no tabata haya mas señal vital.  Paramediconan e ora a pidi Centro di Alarma pa manda un Docter eynan como cu no ta hayando reaccion di e victima.

   E victima ta un turista masculino, di riba 60 aña di edad.  Polisnan a pidi yudansa di Bureau Slachtofferhulp cu a bin yuda guia e famia.

   Dr. Texier a presenta na e Pier, y aki a constata morto di e turista.  DIARIO y Cuerpo Policial ta extende su mas profundo palabra di condolencia.