Tres hoben a filma con nan a destrui bentana di auto di un pober señora

Caso serio na Paradijs

ORANJESTAD (AAN): Un señora humilde y di bon curazon, kende ta busca ningun problema cu su prohimo, cu dolor na curazon a bin ripara cu hende baldadi a pasa y kibra e bentana patras banda drechi di su auto compacto Chevrolet Aveo hatchback color blauw.  Esaki tabata staciona dilanti su cas.

   Un baranca a wordo haya, cu ta indica cu esaki a ser usa pa kibra e bentana di e auto Aveo staciona den Caya Frere Tarcicius na Paradijs.  Ora di check paden, a bin nota cu nada di ladronicia a ser haci.

   Famianan a core check, y hendenan eybanda a mira con 3 hoben lo a pasa pa pret kibra e bentana y ranca careda bay zuid direccion Caya Frere Theodorus.  A splica cu e hoben cu a tira e baranca ta bisti cu short camuflahe, y un camisa blanco estampa cu sea delfin of bayena color preto.  E otro hoben cune tabata bisti cu un short roos, y shirt blanco.

   Otro banda di e casnan aki tin Iglesia Maranatha.  E dolor di spaar hopi pa cumpra un auto, pa cuide den e epoca aki cu tur cos ta halto den prijs, y awor tin di bay cubri gasto di un bentana kibra.

   Un video a circula: Pero a resulta cu e hobennan cu a comete e fechoria aki, a graba loke nan a haci.  Bo ta mira claramente con e hoben ta rek un man y zwaai e baranca kibra e bentana, y despues nan tur tres na coremento.

   Nan a pone e video aki riba social media, y den un rato di ora esaki a bira viral, y tur hende a haya sa kende e dos chabalitonan aki ta.  Nan a wordo identifica como alumnonan di EPB Oranjestad, y ki ril nan a haya pa kibra bentana di hende inocente, no ta conoci.

   Sinembargo ora cu tur nan cara y e video a cuminza circula mas riba Social Media, por a sinti cu comunidad a desaproba e acto baldadi aki di e hobennan.  Na final pa colmo hasta un di e mamanan a bin dilanti, y a ofrece di cubri parti di e gasto cometi pa su yiu.

   Su yiu no ta esun cu a tira e baranca, pero sigur e tin di bay splike kico ta e 101 motibonan pakico e tin di stop di anda cu e tipo di malandronan aki.  Pasobra ta parce cu nan ta bayendo ya caba den mal caminda.

   No ta conoci si acaso denuncia oficialmente a wordo haci na Polis.  E relatonan oficial di Polis di Diabierna, no a menciona nada di e caso aki den Caya Frere Tarcicius.