Trahador Dominicano a cay for di dos piso na Malmok y perde su bida

ORANJESTAD (AAN): E trabao di renobacion of construccion semper ta exigi pa un trahador ta atento di su movimentonan,

specialmente ora e ta haciendo labor riba un stellage of canando na halto riba un piso of na dak.  Cualkier movimento mal calcula, por ponebo yega abao mesora cu tur consecuencia.

   Diasabra mainta pa 10:15 am, Central di Polis a ricibi notificacion serio cu un incidente a caba di socede den area di Malmok.  E informe a mustra cu un trahador cu ta haciendo labor na di dos piso di un Condominio cu ta wordo renoba, a cay y keda gravemente herida.

   Inmediatamente Polisnan di Strandpolitie y tambe di Noord a wordo manda pa e adres, y Centro di Alarma a wordo notifica pa manda Ambulans.

   E prome unidad di Polis cu a yega na e Condominio na Lloyd G. Smith Boulevard 105, a bin topa cu un homber benta abao cu ta fo’i tino y ta mustra di ta grave.  Ambulans a yega un rato despues y cu urgencia Paramediconan a bay check e victima.  Sinembargo nan a bin nota cu e persona abao benta ya no tin señal vital mas, y a pone aparato pa check esaki, y a haya mesun indicacion.

   Personal di Ambulans a notifica Centro di Alarma, cu lo tin di bay busca un Docter pa bin eynan, pasobra nan mes no por haci nada mas pe.

   Centro di Alarma a busca un Docter, y pa 11:50 am, Dr. Texier a constata morto di e homber R.L. di 44 aña naci na Republica Dominicana.

   Esaki a pone cu Polisnan a notifica demas halto autoridad di e caso, y a pone tanto Recherche, team forensico di BFTO, y tambe Departamento di DTI di Gobierno na altura.  Ta bay determina kico a bay malo cu a pone victima cay for di halto.

   Polis a pidi yudansa di Bureau Slachtoffer Hulp pa asina brinda sosten na e famia di e fayecido.

   DIARIO como tambe Cuerpo Policial ta manda palabra di condolencia na famia di fayecido.