SUV coriendo verboden dilanti Funeraria a ocasiona accident

ORANJESTAD (AAN): Diabierna anochi laat, Central di Polis a manda patruya rumbo pa e caminda paralelo

cu ta core a lo largo di WVB Boulevard na Cumana, specificamente dilanti Aurora Funeral Home pa un accident.

   A resulta pa un motibo of otro, chauffeur di un vehiculo SUV, esta Kia Sportage color blanco cu number A-28071 a cuminza core riba e caminda paralelo, ta bayendo direccion prohibi (‘verboden’) rumbo pazuid.  E chauffeur a caba di sali for di e caya di Cmart, y envez di bira bay nort, el a bay zuid den verboden.

   Net e ora ey el a sorprende un Chevrolet Aveo color cora cu number A-3837 cu si ta coriendo corecto riba e caminda, y nan a dal semi-frontal den otro.

   Chauffeur di e Chevrolet a caba di usa e ATM-Machine dilanti Kooyman Mega Store y ta bayendo cas, ora cu diripiente un vehiculo ta bin den verboden su dilanti.

  Kia Sportage a bay man robez subi verboden birando asina un ‘spookrijder’, aunke tin un borchi claramente eynan poni pa indica cu chauffeurnan tin di bira na man drechi.