Stranhero indocumenta a morde polis y huy den Boegoeroei

Durante control

ORANJESTAD (AAN): Diaranzon habitantenan di Noord, specialmente di e area di Montaña parti mainta a wordo sorprendi pa un cantidad di polis den e vecindario.

E agentenan policial na dado momento a subi riba muraya y drenta diferente cura na Montaña, buscando un stranhero indocumenta.

   Un rato prome polisnan a para un Nissan March na Boegoeroei y a resulta cu ambos persona cu tabata den e vehiculo tabata indocumenta.

   Ora cu e polisnan tabata bezig ta detene e stranheronan indocumenta aki, uno a logra core bay. Polis a logra pone man riba dje, pero ora cu el a morde un di e polisnan cu tabata atende cune, el a logra core bay atrobe.

   Esey a pone cu varios unidad di polis a presenta na e area y a cuminza busca e persona cu tabata tin un camisa geel bisti.

   Pa basta rato tabata tin diferente auto di polis para na diferente lugar na Noord, mientras cu agentenan policial a drenta diferente cura na Montaña, buscando e persona cu a scapa.  Te cu Diaranzon atardi ainda polis no a logra pone man riba e persona ilegal.