Señora turista di 78 aña a fayece durante di snorkeling na Mangel Halto  

ORANJESTAD (AAN): Diamars den oranan di mainta, Central di Polis a manda cu urgencia un patruya di polis di San Nicolas rumbo pa Mangel Halto. 

Esey ta debi cu alarma a wordo bati, cu un persona a hay'e den problema den lama.

   Unidad di Polis a mobilisa rapidamente pa e lugar, y Centro di Alarma na su turno a cuminsa manda Ambulans.

   Pa 10:30 am, Polis a yega na e lugar turistico aki, y a bin nota cu ta un turista femenino di edad grandi a haye den problema.  Nan a bisa Polis, cu e señora a bira malo durante cu e tabata den awa.

   Na e lugar a bin compronde cu e señora aki di bishita na Aruba, hunto cu dos miembro di famia a aplica pa un Snorkeling Tour y e señora tabata participando den esey.  Pero algo a bay malo, y e señora a bay den panico y a cuminsa guli awa.  Esnan cu tabata snorkel cune a trata na yuda, y a bay cune na oriya di lama.

   Dos unidad di Ambulans a yega, incluyendo un Rapid Responder cu mesora a pone mashin na e curpa y a cuminza practica CPR pa mira si por pone reacciona bek.

   Pero e intentonan aki tabata envano, y na final e no tabatin señal vital mas.  Ambulans a pidi Centro di Alarma pa manda busca un Docter.  Polis a pidi yudansa di Bureau Slachtofferhulp pa atende e dos ruman homber di e victima.

   Pa 11:20 am, Docter Texier a constata morto di e señora turista di 78 aña di edad di nacionalidad Mericano.  DIARIO y Cuerpo Policial ta manda palabranan di condolencia.