Razzia na cas di 2 ex-Ministro teni Diamars mainta pariba di brug

Confisca data y folders na cas di Chris Romero y Eddie Briesen

ORANJESTAD (AAN): Ex-Ministro Chris Romero di Partido MEP, a ricibi un bishita hopi trempan riba Diamars mainta, ora cu oficialnan di LandsRecherche bao guia di Ministerio Publico, y cu sosten di Cuerpo Policial a tene un razzia na su cas.

   Esey ta loke Ministerio Publico a confirma, y ta un caso cu a haya e nomber awor di ‘Kwihi Zaak”.

   E entradanan hudicial aki a sirbi como un sorto di buskeda den cas, bao guia di Huez-Comisario relaciona cu un investigacion di algun Contract di Servicio cu a wordo firma door di Crispin V.J. Romero den su funcion di minister e tempo ey.

   Segun Ministerio Publico, e entradanan hudicial aki a tuma lugar na cuatro adres na Aruba.  E rista na cas di ex-Ministro Romero na den Savaneta.  Tambe a rista na cas di ex-Ministro Edison Briesen den Dahliastraat.

   Briesen ta funcionando ainda como consehero den Gobierno.

   LandsRecherche a confisca monton di documento, folders, data banks, y demas material necesario pa investiga administracion di cada uno.

   Tin di clarifica cu ningun detencion a tuma lugar riba Diamars.  Ta djis beslag a ser haci riba files di computer y documentonan archiva di papel.  Tur material a wordo hiba pa LandsRecherche pa bay investiga.