ORANJESTAD (AAN) – Otro noticia cu Minister di Husticia, señor Rocco Tjon a comparti den entrevista cu DIARIO,
ta cu e proyecto pa e sede di Cuerpo Policial wordo ubica na edificio di ex-Codemsa, ta bayendo bon, y e ta bay inicia e aña aki ainda. Manera ta conoci, aña pasa a pasa e Ley pa haya e aprobacion pa compromete den un proyecto di tal magnitud, pero ta hopi importante prome cu bay den ehecucion, repasa tur e detayenan y esey e ultimo lunanan aki a tuma lugar.
Asina e mandatario a bisa, y a agrega cu tabata tin bishitanan di trabao door di e desaroyadornan di Hulanda, mirando e hecho cu den e edificio aki ta bay tin hopi funcion y entidadnan nobo cu nunca prome tabata tin na Aruba, pa loke ta husticia.
E dignatario a subraya cu ta pesey e preparacion ta asina importante, pero si tur cos ta bon, e otro luna e destaho publico lo inicia, y esaki ta completamente den man di APFA. Despues di e aña aki mes e trabaonan lo inicia si tur cos ta bon, y siguiendo despues cu e schedule, na comienzo di 2025, e proyecto aki ta full cla.
