Minister Rocco Tjon en ocacion di e di 37 Aniversario di Cuerpo Policial:
ORANJESTAD (AAN) – Minister di Husticia y Asunto Social, señor Rocco Tjon, tabata hopi contento di acompaña Cuerpo Policial, pa celebra su di 37 Aniversario, pasobra pa por logra esaki como organizacion, e ta nifica algo. Asina e dignatario a expresa durante e acto ceremonial.
KPA ta wordo reconoci, no solamente local pero internacionalmente tambe, como un organizacion confiable, y e ta nifica cu KPA ta para literalmente pa loke nan ta bisa cu nan ta para p’e: servicio, integridad y seguridad.
“E ultimo dos añanan aki, cu mi por a fungi como mandatario encarga cu e cartera aki ta satisfecho di wak tur e inversionnan cu a tuma lugar, specialmente den e parti di material y persona. Kiermen, cursonan, etc., pa nan por tin e material y personal necesario pa nan por haci nan tarea na un manera eficiente y eficaz, pero tambe mi ta contento cu e inversionnan cu nos por a haci en general, pa proyectonan di seguridad manera camara, radar, esun manera computer (ACT), autonan nobo”, Minister Tjon a subraya.
El a agrega cu e ta ripara cu esaki ta motiva Cuerpo Policial y pa e motibo ey nan por a presenta, siman pasa, e cifranan di criminalidad y por wak un reduccion grandi den tur e diferente delitonan. Esaki obviamente, tin di haber cu decisionnan strategico cu ta wordo tuma y inversionnan pa duna e personal di KPA e material necesario.
“Pero na final d dia, loke ta haci e diferencia ta e dedicacion y determinacion di tur e agentenan policial, cu bao circumstancianan dificil, pasobra eherce e tarea aki den un comunidad chikito, ta trece un peso extra cune, y apesar di a wordo scrutina door di personanan cu NO sa miho, pero hopi importante ta cu nan a wordo scrutina door di personanan cu SI sa miho, nan ta keda dedica y nan ta brinda e servicio, garantiza seguridad y para pa integridad apesar di tur cos. Nos ta celebra hunto cu nan awe, pero nos ta reflexiona tambe riba e trabao grandi y valioso cu KPA ta eherce”, e dignatario a remarca.
