Polis na Aruba a detene 10 hoben envolvi den racha di ladronicia di auto

E asina yama Kia Boys y e TikTok Challenge

• Hopi Kia Rio a wordo horta usando un simple waya di USB
• Autonan marca Hyundai tambe ta core riesgo 

ORANJESTAD (AAN): E informe di mas di un aña pasa di DIARIO a keda confirma!  Den ultimo luna Cuerpo Policial Aruba ta constata cu tin basta hortamento of intento pa horta autonan specialmente marca Kia modelo Rio y esey DIARIO tambe a bolbe trece dilanti tambe.

   Polisnan a tuma nota tambe cu malechornan ta purba di horta e Kia modelo Sportage como tambe Kia modelo Picanto purbando e mesun Modus Operandi.
   Esaki ta un fenomeno cu a cuminsa na Aruba ora grupo di hobennan a cuminsa haci e “TikTok challenge”.
Door di uza un screwdriver y un USB cable charger di telefoon, ladron por drenta y den apenas 30 seconde ya nan ta hinca e USB cable den e parti di ignition switch desarma y start e auto encuestion. E sospechoso ta graba su mes haciendo e acto aki pa despues post e riba social media di TikTok.

   Ta asina cu departamento di Team Motorvoertuigen Criminaliteit (TMC) kier concientiza esnan cu tin e auto menciona pa pone mas atencion y precaucion pa evita cu e auto ta worde horta. Doñonan di e autonan por preveni door di pone alarma of tambe klem/lock di stuurwiel.

   Diez sospechoso: Te cu awo e Team a detene por lo menos 10 sospechoso relaciona cu e casonan di joyriding di autonan Kia modelo Rio. E edad di persona deteni ta cuminsa for di 14 aña pa 21 aña.
   Polis tin atencion pa cu e fenomeno aki y ta avisa pa tur persona cu tin pensa di haci esaki, cu bo chens ta grandi di worde gara y deteni como consecuencia cu bo lo hayabo ta bay cera. Corda esaki ta un delito y tin castigo riba dje.
   Mayornan di e sospechosonan menor di edad mester corda cu nan ta por worde pone responsabel pa e gastonan di e daño haci na e auto como tambe daño na tercero.
   Mayornan papia cu boso yiunan y splica nan e consecuencia cu e “TikTok challenge” tin. NO ta solamente e yiunan ta bay cera, pero abo como mayor ta worde poni responsabel pa tur gasto envolvi!

   Origen di e problema: Tabata na final di aña 2022 cu ya caba DIARIO a cuminsa raporta riba e peligro di e “Kia Challenge” aki principalmente na Merca y Canada, unda gruponan di hobennan yamando nan mes ‘Kia Boys’ tabata djis usando cualkier waya Type-A di USB Cable bo por start cierto vehiculonan Kia y tambe Hyundai cune.

   Tur esaki debi cu Kia y Hyundai kier a “spaar placa” ora di fabrica cierto autonan entre aña 2015 y 2021 y no a instala loke ingenieronan ta yama ‘immobilizers’.  Esaki ta sistemanan cu na Aruba ya caba tabatin autonan di otro marca ta wordo bendi como 30 aña pasa caba.  Ta autonan cu ekipo electronico di seguridad, cu ta evita cu e motor ta start si acaso bo no tin un yabi corecto poni.

   E yabinan aki tin un microchip den dje (un tipo di ‘transponder’) cu ta comunica cu e auto, y e ora numa e motor por start.  Autonan di diferente marca tabata pone esaki standard den añanan 2000 en adelante.

   Pero Kia y Hyundai kier a spaar placa, y nan a keda sin usa e microchip aki.  Na Merca ta trata aki di Hyundai Accent (2015-2021), Hyundai Elantra (2015-2021), Hyundai Kona (2015-2021), Hyundai Santa Fe (2015-2021), Hyundai Tucson (2015-2021), y Hyundai Veloster (2015-2018).

   Na Merca ta trata tambe di Kia Forte (2015-2021), Kia Optima (2015-2021), Kia Rio (2015-2021), Kia Sedona (2015-2021), Kia Sorento (2015-2016), Kia Soul (2015-2021), y Kia Sportage (2015-2021).

   Dificil pa haya aseguro: Consecuencia di esaki ta cu e modelonan di Hyundai y Kia aki awor na Merca ta dificil pa haya aseguro pa nan.  Companianan grandi a djis stop di cubri tur tipo di aseguro riba e autonan aki.  Pesey awor bo por haya e autonan aki 2ndo Mano cumpra na prijs di baca flaco, pero ningun hende kier cumpra nan debi cu bo no ta haya aseguro.

   A bin cu extra presion tambe door di National Highway Traffic Safety Administration riba e fabricantenan pa nan haci algo cu e aumento drastico di autonan Kia y Hyundai na Merca.  Tabata Cuerpo Policial di Milwaukee (Wisconsin) cu na Februari 2021 a cuminsa ripara un aumento den cantidad di hortamento di autonan Kia y Hyundai.

   Na Los Angeles (California), e trend aki a produci un aumento di 85% di hortamento di autonan Kia y Hyundai na 2022 compara cu 2021.  Na Chicago, e hortamento di e autonan aki a aumenta nuebe biaha mas hopi, y muchanan di hasta 11 aña di edad a participa den e retonan aki pa pone video riba TikTok.

   Dia 23 di October 2022, seis teenager di 14 te 19 aña a horta un Kia Sportage na Buffalo (New York), y cuatro di e teenagernan a perde nan bida ora cu nan a bay dal y kibra e auto horta.  Buffalo Police Department a liga e accident aki na e Kia Challenge.

   Reaccion di companianan: TikTok a indica cu nan lo bay purba elimina tur video cu tin di haber cu e Kia Challenge for di nan plataforma.  Kia a core bisa cu desde 2022 nan lo bolbe cuminsa instala immobilizers mescos mayoria otro compania si a sigui haci semper.  Hyundai a trece na Februari 2023, un update di software pa algun modelo di nan, cu ta bay evita cu por sigui uza un waya di USB-cable pa start e autonan.  Pero otro autonan, Hyundai a djis regala e doñonan un simple lock di stuurwiel.

   Pero doñonan di Kia y Hyundai na Merca a hiba e companianan dilanti Corte den un ‘class-action lawsuit’, y e dos marcanan di auto a bay di acuerdo pa paga 200 miyon Dollar, di cual 145 miyon a bay pa perdida cu e doñonan di auto a sufri.  Sinembargo na final, un Hues Federal a rechasa e acuerdo aki.