Polis a topa cu boto pega den mangrove

ORANJESTAD (AAN): E dianan aki, un area di presion halto cu ta keto bay ‘colga’ den parti nort di Lama Caribe, ta produciendo bientonan relativamente fuerte rond di Aruba.

   Y esaki ta trece problema tambe pa esnan cu ta nabega riba lama, y algo a pasa na parti zuid di Aruba tambe riba Diabierna mainta.

   Vocero Policial Lito Lacle a confirma, cu Diabierna mainta na momento cu un boto di Polis Maritimo ta patruyando riba e lama pazuid di Aeropuerto di Aruba, nan a mira un boto mediano ta posicion na un forma inusual cerca di rif.

   E rif aki ta di Renaissance Island, y nan a mira cu e boto ta manera pega den e mangrove.

   Polisnan Maritimo a dicidi na yega cerca, y a bin nota cu ta trata di e boto ‘Sea Queen’ cu ta duna Scuba Diving Tours na hendenan local como tambe turista.

   Posiblemente debi na biento fuerte combina cu coriente fuerte di lama, e boto a keda hala y a bay stagna den e Mangrove, y no por a sali bek riba su propio forza.

   Esnan di Polis Maritimo a ofrece yudanza na esnan di e boto, pa yuda rek y saca nan di e posicion precario.  Nan a acepta, y mesora a zwaai un cabuya pa nan.

   Polis Maritimo cu su motornan potente a logra di yuda saca Sea Queen for di e area mal pega di Mangrove.  Y como cu ainda nan tabatin dificultad, e ora Polis Maritimo a dicidi na sigui tow nan, y a hiba nan na un Pier na altura di Bucutiweg, unda nan por a mara pa asina revisa e boto.

   E bon noticia ta cu tur hende ta sano y salvo.  Despues di esey, Polis Maritimo a sigui cu nan patruyahe y a notifica Central di Polis di nan hazaña.