Despues di un buskeda intenso
ORANJESTAD (AAN): Relaciona cu un caso di maltrato severo contra un mama y dos menor di edad, cu a tuma lugar dia 6 di juli, Cuerpo Policial a informa cu polis a pone man riba e homber Sandjay Maduro.
Sandjay Jaderick Hildeward Maduro, tambe conoci como 'Jay' y 'Jayden' tin 33 aña y ta naci na Aruba.
Polis a pidi comunidad cu urgencia si tabatin cualkier informacion di paradero di Sandjay Maduro, pa informa esaki mesora na nan tiplijn. Diferente unidad di Cuerpo Policial tabata envolvi durante e buskeda, incluyendo K-9.
E caso di maltrato serio a tuma lugar na Pos Chikito, pero Maduro a wordo captura den bario di Sta Cruz. Maduro a maltrata un baby di dos aña y otro di apenas ocho luna. E maltrato tabata asina severo cu e muchanan mester a wordo interna den hospital. Segun informacionnan di KPA, e ta acusa di a viola articulo 2:275, 2:255 y 2:288 di e “Wetboek van Strafrecht van Aruba”.
Sigur un tremendo trabao di Cuerpo Policial, cu alaves kier a yama danki na nos comunidad di un of otro manera por a yuda polis cu e caso serio aki.
