Persona cu tabata tin basta tempo morto haya den un cas na Playa

Su curpa ya caba a bira skelet

ORANJESTAD (AAN):   Polis a inicia un investigacion relaciona cu un caso cu a sosode diaranson mainta na Concessielaan, net na e cruzada poco pazuid cu Dominicanessenstraat.

   Ta asina cu  pa mas o menos 9:00 am,  polis a wordo notifica di un situacion cu a confronta ora cu algun persona a yega na un cas abandona den e caya ey, pa haci esaki limpi y a topa c'un persona sin bida.

   Tur cos ta mustra cu e persona lo tin basta tempo morto, y pa e motibo ey locual a bin topa cu ne tabata practicamente su skelet. Autoridad ainda no sa ken e identidad di persona, ni tampoco si e ta un femenino of masculino.

   Recherche di Playa a yega eynan, y a core manda busca Team Forensico di BFTO pa yuda documenta e area, y Team di investigacion a confisca e curpa pa asina haci un investigacion riguroso y determina si ta trata di un crimen of kisas un morto natural.

   E cas aki ta net dilanti Sunrise Bar, y tabata conoci antes como e “Cas di Maria Hendrick” cu tabata conoci pa bendemento di frio cu muchanan di scol.  E cas ta abandona y poni awor pa “For Sale”.  Pesey un ekipo a bay eynan pa haci e cas limpi, y aunke e ta hermeticamente seya, a bin topa cu un curpa humano eyden.

   Pa cu e caso aki, tabata tin presencia di tur instancia concerni na e sitio pa asina atende cu ne debidamente.

  Polisnan ta pidi tur hende cu por tin informacion, pa yama Tipline di Polis na 111-41, y si acaso bo kier sigui duna mas detaye, bo por menciona bo number di telefon y claro cu Recherche lo yamabo pa haya mas detaye.