Persecusion espantoso Diadomingo atardi den distrito di Paradera

ORANJESTAD (AAN): Tur cos a cuminsa Diadomingo atardi poco despues di 6:30 pm, cu un unidad di Polis di Noord cu tabata controlando den su rayon cu ta inclui Jaburibari,

a mira un Toyota Yaris di 4 porta color shinishi, y a dicidi pa stop e chauffeur pa haci un control.

   Sinembargo e persona tras di stuur di e auto no a cumpli cu e ordo, y mas bien a primi trot y cuminsa aleha di e lugar.  Mesora Polis a start un persecusion, y via Tetra Radio a duna detaye cu nan ta persiguiendo e Toyota Yaris shinishi cu number A-66150 den Jaburibari y bayendo den caminda di santo pa Nuñe.

   E unidad di Polis a sigui su tras cu zwaailicht y sirena.  Demas unidadnan di Polis den e sector, a cuminsa mobilisa pa e area tambe.  E auto a sigui pasa door di Nuñe y a tuma e caminda di asfalt pa finalisa net pabao di Scol Preparatorio Nos Paraiso na Paradera.

   Net e Diadomingo atardi aki tabatin par di peaton canando riba acera, y nan a haya nan ta hala un banda cu rapidez, esey ta debi cu e chauffeur di e Toyota Yaris a hasta cuminsa core riba acera pa evita di pega den trafico.

   E momento ey ya caba tabatin monton di unidad di Polis cu a aglomera, y asina nan a sigui su tras.  E persona tras di stuur (vehiculo stuur banda drechi) no tabata worry cu nada, y ta djis primi trot.

   Asina nan a logra drenta den area di Casibari, y cu Polisnan keto bay su tras.  Diripiente den un zona, el a stop e auto, habri porta banda drechi y rek un careda na pia y drenta den pida mondi.  Kizas e conoce e mondi ey bon, como cu el a logra huy tambe asina.

   Den su coremento, el a bay lagando un slof atras.  Pues el a core huy riba un slof so.

   Polisnan a confisca e auto mientras tanto, y lo sigui busca forma pa gara e persona cu a logra huy.