Pelotero deteni despues di a core burachi y ocasiona accident

ORANJESTAD (AAN): Tabata Diadomingo anochi cu un celebracion di victoria di wega di Softball a finaliza nada bon pa un pelotero.

Chauffeur di un Toyota Yaris color beige cu number A-55367 coriendo riba e caminda di Watty Vos Boulevard for di rotonde di Cumana rumbo pa rotonde di Wayaca, dado momento a perde control riba su stuur.  E chauffeur a bin cu un storia cu un otro auto a pasa su dilanti.  Esey a pone cu el a perde control riba su Yaris, y esaki a hala na su banda robez, dal den e separador di caminda, bay halto y finaliza casi mey-mey di esaki.

   E auto a sufri djis un tiki daño ora cu el a dal na e bloki di e separador, y ora cu el a pega riba e sero cu e parti abao a dal contra e bloki tambe.  Kizas lo por tin mas daño bao di e vehiculo.  Aunke sigur e gasto mas grandi lo ta pa bay paga e contratista Mota-Engil pa haci reparacion, y e compania sub-contratista cu ta encarga pa embeyecimento di e separador.

   Ora cu Polis a yega na e lugar cu tin net banda pabao di e edificio di Aru-Wood, un tiki panort di Kooyman Megastore, e agentenan a papia cu e chauffeur.  E persona aki  den su uniform deportivo di softball team Destroyer a indica cu el a sali ileso.  Pues ningun hende a resulta herida.

   Sinembargo ora cu Polis ta papiando cu e pelotero, nan a bin nota cu holor fuerte di alcohol ta sali for di su rosea, e ta papiando cu un lenga pisa, y cada rato e tin di leun na e auto pasobra e no por para drechi. Esaki ta suficiente pa Polis a aresta e pelotero, pasobra el a viola articulo 5 inciso 2 di Ley di Trafico, pues ta core burachi.  Polis a tuma tur nota di e accident, y despues un Takelwagen a yega pa asina kita e vehiculo di eynan.  E pelotero a wordo hiba Warda di Polis, unda el a ser presenta dilanti un Fiscal Auxiliar.