Peaton herida mortalmente den accident laat den anochi

Vehiculo SUV a dal persona

• Victima a finalisa como 5½ meter leu di caminda 

ORANJESTAD (AAN): Diadomingo anochi pa 11:15 pm, yamadanan a cuminsa drenta na Central di Polis pa indica cu un accident basta serio a socede riba caminda principal di Aeropuerto pa Playa, na altura di Camacuri.  Personanan yamando a indica cu e ta na altura di Aruba Bank, y cu auto a dal un hende na pia.

   Inmediatamente Central di Polis a cuminsa manda patruyanan di Playa rumbo pa e lugar, y a notifica Centro di Alarma pa nan tambe manda Ambulans.  En total 2 unidad di Ambulans a sali rumbo pa e lugar.

   Victima cay riba tereno di Banco: E prome unidad di Polis cu a yega a bin haya un persona masculino benta abao parti paden di e caminda paralelo chikito net na salida di Aruba Bank.  Pues e ta over di e berm principal, y a cay te riba e acera traha di piedranan chikito blanco di decor na e Banco.  Tin indicacion cu esaki ta tereno di Aruba Bank.

   Nan a mira cu e persona su situacion mesora a mustra di ta critico.  A core pidi pa Ambulans yega cu maximo urgencia.

   Como 50 meter mas pabao riba e caminda, Polis a bin haya un SUV tipo Kia Sportage color preto cu number A-18809 cu basta daño material na e parti dilanti y banda drechi di e vehiculo.

  E prome unidad di Ambulans mesora a cuminsa atende e victima cu tabata benta di banda riba e acera di e uitrit paralelo.  A pone diferente aparato pa monitor su curason.  Pero esaki tabata hopi debil y despues no tabatin señal vital mas.  Un otro Ambulans a yega pa duna sosten.

   Chauffeur keda deteni: E chauffeur di e Kia Sportage tambe a worde atendi den Ambulans.  Despues di a haya un chekeo, Polisnan a haya necesario pa lage haci test di supla.  Esey ta debi cu nan a mira cu su wowonan ta basta cora, e ta papia cu lenga pisa, y no por a cana drechi riba su pia.

   Ora cu a haci test cune, e resultado di Alco Sensor IV a indica cu e tin un nivel cu a sobrepasa e maximo legal na Aruba.  Pesey automaticamente nan a detene, y a laga Vehiculo di Transporte buske pa hibe Warda di Polis. 

   Vehiculo di Transporte di Detenido a yega y na un manera no-comun, autoridad a manera tapa e persona pa publico, ni prensa mir’e, e motibo pakico el a bay asina no ta conoci.

   Mientras tanto, a manda busca demas autoridadnan halto pa e lugar, incluyendo Specialista di Trafico, y tambe Ekipo Forensico di BFTO.  Halto Comisario Ramon Arnhem tambe tabata presente.

   Tur hende a keda observa cu e victima a keda como 5,5 meter panort di caminda principal, y ta pensa cu kizas e vehiculo a dal e peaton, mande halto y kizas el a dal riba un tubo di borchi di Verboden cu tin eynan, y finalisa eybao.  Of kizas e vehiculo tabata coriendo riba e caminda paralelo chikito aki y a dal den e peaton y e borchi di trafico.

   Polis den su relato na prensa no a menciona nada di esey.  Kizas esaki ta bin debi cu e investigacion ainda no a finalisa.

   Via di Centro di Alarma a pidi pa presencia di Docter pa bin na e lugar.  Dr. Texier a yega y pa 11:46 pm a constata morto di e homber Altair Jaques Brelaz, di 54 aña, naci dia 30 di Augustus 1969 na Brasil, y bibando na Aruba.  El a bira e di cuatro morto den Trafico pa 2024.

   Vocero policial, Liliana Rasmijn a agrega, cu nan a haya contacto cu e famia di e fayecido.

   Na famia y amigonan di e fayecido, DIARIO y Cuerpo Policial Aruba ta manda palabra di condolencia.