Pasahero femenino a keda pega den accident na Piedra Plat

Hit & Run hopi serio riba Pasco anochi

ORANJESTAD (AAN): Pasco anochi algo prome cu 10:30 pm, un unidad di Polis di Santa Cruz, como tambe Ambulans a worde manda un poco pabou di e brug di Santa Cruz pa Piedra Plat, pa un accidente cu hende herida cu a bira un Hit & Run.

   Na yegada polis ta topa cu un Toyota Yaris color di oro cu number A-19003, benta pazuid di caminda, contra algun baranca net banda di e T-weg pa bay Santa Rosa.

   Testigonan a bisa cu e otro auto envolvi a bandona e lugar, tumando direccion pariba, pues Santa Cruz.  Nan a indica cu e otro auto ta uno compacto, parecido na un Nissan Cube.

   Polis a nota cu e persona sinta riba asiento di pasahero den e Toyota Yaris ta herida.  Na yegada di Paramediconan, a bin ripara cu ta dificil pa sak’e di eynan.  Asina a pidi Centro di Alarma pa manda Vehiculo di Rescate pa yuda sak’e.  Nan a nota cu el a haya varios trauma na su cara, y tabatin herida sangrando.

   Vehiculo di Rescate a yega, y mesora bomberonan a analisa e situacion, y a opta pa corta y kita dos porta di e Toyota Yaris, pa asina e victima por wordo libera mihor.

   Unavez cu esey a socede, a bay cune mesora pa Servicio di Emergencia na Hospital pa tratamento.  Specialista di Trafico a yega eynan tambe pa cuminsa cu e investigacion.

   E caminda di Piedra Plat pa Santa Cruz a keda basta rato cera debi na e accident aki.  Esnan cu por tin detaye di e accident, por yama Tipline di Polis na 111-41.