Ora di bolter un ocupante a wordo catapulta for di auto  

Cuatro persona herida den accidente serio na Pos Chikito

• Tanto auto y e vehiculo a keda total-loss 

ORANJESTAD (AAN): Diaranson anochi poco despues di 7:30 pm, Central di Polis a manda unidadnan di Polis di San Nicolas cu urgencia pa e caminda parti paden di Pos Chiquito pa un accident basta pisa.  E prome unidad di Polis a yega y haya un auto sedan Mitsubishi Lancer color preto, como 50 meter pariba di Kam Man Food Mart bastante kibra.  E auto aki a bolter y finalisa bek riba su cuatro wielnan net dilanti e cas Pos Chiquito 28.

   Casi 26 meter mas pariba, Polis a bin topa cu un vehiculo tipo SUV, esta un Hyundai Tucson color berde cu number A-67642 kibra semi-frontal na banda robez.  E vehiculo aki awor ta banda pazuid di caminda, net pabao di e cruzada aki di Pos Chiquito cu ta bay pa drenta Scobillostraat.

   Mas unidad di Polis a yega y a cera e caminda, y a cuminza check condicion di tur esnan herida.  Testigonan a bisa Polis cu e auto y e vehiculo a dal den otro na e cruzada ey.  E Hyundai Tucson tabata sorteer pa su man robez, mientras cu e Mitsubishi Lancer tabata bin di direccion contrario.  Debi na e impacto, e Hyundai a dal un buelta di 360 grado eynan, y e Mitsubishi Lancer a bolter y finalisa 35 meter mas pabao di e cruzada.  Den e boltermento un persona masculino a wordo saca di e auto y a cay riba santo.  Un persona femenino sinta padilanti debi na boltermento a finalisa den asiento patras.  Esaki ta ilustra e importancia di bisti seatbelt semper ora di core den auto.

   Den e Hyundai Tucson tabatin un dama na stuur, y patras den auto tabatin dos mucha menor di edad.  Centro di Alarma pesey a manda un total di 3 unidad di Ambulance pa e lugar.

   Paramediconan a nota cu tanto e cabayero y e dama di e Mitsubishi Lancer ta hopi grave, y a pone Cardiac-Monitors pa vigila nan batimento di curazon.  Pero mesora a dicidi pa hiba ambos prome rumbo pa Hospital cu urgencia.

   Esnan den e Hyundai Tucson tambe despues a wordo hiba pa Hospital.  Un persona den uniform di Casino tabata yuda carga un baby cu a keda toch ileso.  Y e persona aki a keda yuda trankiliza e baby, te ora cu e dama y e otro mucha a wordo hiba den Ambulance.

   Polis mesora a start investigacion, y a haya hopi declaracion di testigonan cu a mira loke a socede. 

   Un suplica un biaha mas na automobilistanan, pa e dianan aki di fiesta, ban reduci velocidad un poco pa asina tur hende por pasa un mihor Pasco y Aña Nobo.

Tur esnan herida a worde transporta pa Hospitaal. Polis di trafico a presenta y hunto cu compania di seguro a start nan investigacion. 

Falta di preferencia a hunga un rol y tambe velocidad halto.