Narcotraficante Curasoleño miembro di Clan del Golfo descubri ta hiba un bida luhoso na Barranquilla

ORANJESTAD (AAN): Un hefe di clan di narcotrafico na Colombia, cu pa colmo ta procedente di Curaçao, a wordo gara Diasabra mainta door di Polis na Barranquilla, Colombia.

   Loke a pone autoridad nan wowo cay riba dje, ta e forma excentrico di biba cu e tabatin.  Pesey mes Diasabra nan a pone man riba Anthony Deo Rampersaud Bhajan, mihor conoci como ‘Tony’.  E ta un homber cu desde December 2019 ta wordo busca cu un Red Alert door di Interpol.

   Segun autoridadnan, ‘Tony’ di Curacao a wordo busca cu un orden di extradiccion, y inteligencia policial a logra haya sa di su paradero danki na su forma di biba na Barranquilla, mey-mey di un bida di rikeza y e forma cu e tabata blof cu esaki, cu tabata aspectonan clave cu a yuda Polis haya sa unda e ta biba.

   E director general di Polis Nacional, esta general Jorge Luis Vargas-Valencia, a bisa cu Anthony Rampersaud tabata e ‘link’ di Juan Jose Valencia Zuluaga, conoci como ‘Falcon’ of ‘Andreas”, cu ta e top traficante di droga y financiador di e ‘Clan del Golfo’, kende tambe a wordo captura den e cuadra di investigacion di Polis y Militarnan, yama ‘Caso Agamenón II’.

   Tony tabatin forma di blof, tipico di e generacion nobo di narcotraficantenan.  Esakinan ta caracteristicanan cu ta wordo revisa y analiza cu DEA y FBI, y autoridadnan di Reino Uni, debi cu for di e epoca di Pablo Escobar, no a yega di mira asina hopi nivel di luho, excentricidadnan, y deroche di e comportamento di e hobennan narcotraficantenan asina, segun e director Vargas-Valencia a bisa.

   Na mesun momento, Polis a divulga tambe e captura di ‘Falcon’.  E homber aki tambe tabata hiba un bida di luho den municipio Rionegro na departamento di Antioquia.  E tabata biba den un mansion rondona pa autonan y motorcyclenan caro.  El a wordo aresta eynan mes.

   Juan Jose Valencia Zuluaga conoci como ‘Falcon’, a wordo reconoci door di Polis como e cabezante principal di narcotrafico y homber di confianza di Otoniel.

   Polis di Colombia a indica cu e homber aki tabatin 11 aña meti den un carera criminal cu e Clan del Golfo, y el a cuminza su carera criminal ora e tabata encarga pa manda cocaina for di Colombia pa Europa, cu aprobacion di ‘El Indio”.

   Inteligencia a apunta dede riba dje pasobra e tabatin control di e ruta di droga for di Cartagena (Colombia) rumbo pa Belgica, Hulanda, Guatemala, y Republica Dominicana, y bao di dje e tabatin 225 persona cu ta miembro di su organizacion criminal.

   Falcon tabata e cabezante principal di e grupo aki cu tabata produci mas di $60.000.000 di droga y esey a pone haya confianza di Otoniel y rapidamente crece den e structura.

   Durante e aresto riba Diasabra, nan a confisca varios arma pisa, e.o. 9 pistol, 3 revolver, 1 machine-gun, 3 scopet, 2 rifle, 35 cartucho di bala, 3 telescoop pa arma, 1 adapter pa machine-gun, 3 silencer pa pistol, y 1 nightvision scope, y tambe 13 vehiculo caro y luhoso.  Nan a haya tambe 11 smartophone, 3 laptop computer, 2 external harddisk yena cu informacion, y tur esey ta wordo investiga pa autoridadnan forensico.