Lo bay tin tres post di Polis pa Campamento

ORANJESTAD (AAN): Campamento a start sali den gran forma tur rond di nos isla. Tanto band’i lama, den cunucu, riba rif y na diferente ranchonan nos comunidad a sali den gran forma pa por campa huntu cu famia y conocirnan un biaha mas.

  Den cuadro di esaki, durante semana santa lo tin tres post di Polis ubica na tres diferente districto.  Pa Noord e lo ta na Strandpolitie.  Pa Oranjestad e lo ta na Warda di Polis Oranjestad (bieu). Pa San Nicolas e lo ta na exEsso Club banda di Jads.

    Post di Noord lo controla Eagle Beach, Fishermans Hut y Arashi.  Post di Oranjestad lo controla:  Nikki Beach, Bushiri Beach, Surfside y Linear Park. Post San Nicolas lo controla: Santo Largo, Mangel Halto, Zwart Mangel, Rincon, Grapefield, Baby Beach, Rodgers Beach y Santana di Cacho.

   Riba lama tambe nos lo tin unidad policial conocí como Maretiem Politie cu lo controla boto y tambe duna prome auxilio.

   Hunto na e postnan aki lo tin personal di Cruz Cora Aruba cu tambe tin nan personal y life guardsnan cla y prepara pa duna prome e auxilio.

   Cada post ta bon prepara cu materialnan pa por brinda prome auxilio manera:  First Aid kit, Heart defibrilator y tambe equiponan cu Polis por eherce nan trabao. Di e forma aki Cuerpo Policial Aruba lo tin polisnan tanto riba pia, den auto, riba bicicleta tambe riba quadracer pa por controla durante semana santana pa asina por percura pa seguridad di cada un ciudadano cant’i lama.