Liliana Rasmijn a bira oficialmente Vocero Policial di Aruba

E ta algo historico pa Aruba!

• Pa prome biaha un ser femenino ta ocupa e puesto 

ORANJESTAD (AAN):  Altocomisario di Cuerpo Policial Aruba a anuncia e siman aki oficialmente cu señora Liliana Rasmijn ta bira e prome ser femenino cu ta bira Vocero Policial di Cuerpo Policial Aruba.

   Departamento di comunicacion: Cuerpo Policial Aruba tin su propio departamento di comunicacion. E ta un departamento cardinal cu e meta pa informa nos comunidad tur locual ta informacion importante di Polis. Tambe ta coordina informacion interno pero tambe publico cu mensahenan preventivo pa asina preveni cu bo lo cay den man di Husticia. Prome cu Status Aparte e departamento aki tabata dirigi pa G. Nicolaas (q.e.p.d.) despues sigui pa sr. Vi Marten (q.e.p.d.) cu a tuma e timon over. Cu e entrada di Status Aparte Sr. Vi Marten tabata e prome vocero oficial di Pais Aruba, sigui pa G. Jansen(q.e.p.d.), Pedro “Shon Pe” Krozendijk, C. Bennet, Edwin “Papito” Comenencia y Lito Lacle. Nan tabata e cara importante cu a carga e departamento durante añanan.  No por lubida Chido Maduro (q.e.p.d.) tampoco cu tambe a yuda de vez en cuando.

   Pa prome biaha un ser femenino: Despues di aña 2014 cu Sr. Lito Lacle como Vocero Policial y señora Liliana Rasmijn como suplente nan a sa di carga e departamento pa mas cu 10 aña. Bou Sr. Lito Lacle Aruba a mira un cambio y direccion nobo pa e departamento. Awor despues di 10aña Sr. Lito Lacle a sigui desaroya su mes pa un departamento nobo y asina aki a habri e oportunidad pa un Hefe nobo.

   Señora Liliana Rasmijn no ta cara un desconoci. el a gana e confianza di biaha di comunidad y Aruba completo a bras'e como e vocero suplente. Señora Liliana Rasmijn a logra haya e funcion nobo aki sin ningun problema el a demostra su capacidad y ideanan inovativo pa hiba e departamento na un siguiente nivel tanto Nacional y Internacional.

   Ken ta Liliana: Liliana ta simpel, humilde y semper cla pa yuda. Semper cu un smile di skina pa skina riba su cara.  Liliana ta unico yiu di su mama Dilia Rasmijn y defunto tata Archi Backer. Dilia y Archi a lanta Liliana den un cas humilde cu hopi Fe, norma y balornan halto y na unda semper tabata cla brinda yudansa  y ta hacie mesora for di curason sin spera nada a cambio

   Liliana ta mama soltera di dos yiu homber cu ta Marc Croes 24 aña y Alexander Croes di 21 aña.  Semper a lucha pa hiba su yiunan dilanti. Pero bida ta dal buelta y ta pasa den momentonan dificil pero semper a persevera y sigui padilanti. Marc y Alex ta su rason pa lanta tur dia y ta un ehempel pa su yiunan. Semper Liliana a sa di motiva su yiunan y encurasha nan pa nan ta semper e mihor version di nan mes. Conhuntamente cu su mama Dilia cu ta e motor importante pa guia su yiu muher stima cu ta Liliana.

   Liliana a bira polis: Liliana a cuminsa su carera policial dia 15 juni 1998. Semper e tabata kier di un manera of otro sirbi su Pais. el a wak e solicitud e tempo ey den corant y a bay  haci e testnan y a sa di pasa nan cu exito! Di e forma aki Liliana su carera policial a cuminsa. Despues di a termina su estudio policial Liliana a traha na diferente departamento manera; Polis uniforma, reorganizacion, interpol, pa despues traha pa 12 aña den departamento di Inteligencia.

   A yega momento pa haci un cambio drastico y sigui desaroya su mes. 15 januari 2014 Liliana a bay over na traha den e departamento di comunicacion di Polis y a bira e prome vocero suplente femenino di KPA.  el a traha hunto cu sr. Lito Lacle cu tabata vocero di KPA y  hefe di e departamento di Comunicacion, Informacion y Prevencion. Un trabao full diferente na unda Liliana mester a educa su mes pa loke ta traha comunicado, duna charlanan riba diferente nivel, duna informacion na e comunidad y poco poco despues di tempo a bira un di e caranan importante di Cuerpo Policial Aruba. Un trabao cu el a desaroya su mes pa mehora y ta mihor den dje dia pa dia. Su soño ta pa un dia por marca historia y bira e prome hende muher como vocero di Cuerpo Policial Aruba y na cabes di departamento di comunicacion.

   Diploma di liderazgo: Liliana a haci diferente curso y na 2023 a haya e oportunidad pa sigui estudio di KO (kader opleiding) . Despues di un estudio pisa y hopi intensivo y cumpliendo cu su trabao di tur dia, Liliana a termina esaki cu exito! Cu e diploma aki el a haya e oportunidad di solicita pa e puesto di hefe di departamento di comunicacion.

  Tabata despues cu sr. Lito Lacle a worde promovi na otro departamento di Polis e oportunidad pa Liliana a habri. Altocomisario di Polis Ramon Arnhem a y ta traha hopi di cerca cu Liliana y a wak e potencial fuerte den Liliana. Despues di a habri solicitud Liliana a aplica y a logra esaki cu exito! Tabata e momento cu emocionnan a bira halto cu riba e prome dia di 1 december 2024 pa exactamente 12’or di anochi Liliana su soño a bira realidad. Ariba e fecha aki el a tuma e batuta oficial y carga e departamento di comunicacion di Polis pa prome biaha den Historia di Pais Aruba.

   Hopi Orguyoso: Altocomisario di Polis Drs. Ramon Arnhem ta sumamente contento y orguyoso di anuncia cu Liliana Rasmijn ta bira e prome hende muher cu ta lidera un departamento di comunicacion cu ta asina importante pa KPA, pero tambe pa comunidad. “Liliana a sa di gana e curason di e comunidad. Liliana ta un persona hopi innovativo y mi ta gusta su manera con e ta pensa y con e ta cla pa hiba e departamento na otro nivel. el a haci esaki caba dia di eleccion y mi a keda impresiona. Grandi y chikito ta mira Liliana como un hende muher Polis cu hopi respet y pa ami e ta un honor pa anuncia esaki” tabata palabranan di altcomisario Arnhem.

   Liliana Rasmijn su lema di bida ta: “I can and I will”. Mi por y mi lo logra, no tur ora ta facil pa logra bo meta. Bo lo haya obstaculo pero semper cara na laira . Seca bo lagrimanan pone un sonrisa riba bo cara y sigui focus pa bo metanan.  Bo por mas cu bo mes ta kere.  Na cada un hoben cu rato rato sa duda si nan por, keremi bo por . Abo hende muher bo por, nunca give up. Kere den bo mes!. Pero mas cu tur mi ta dedica e esfuerso y e guia aki na mi defunto tata Archi cu mi ta sinti e tey semper cu mi y mi sa e ta super orguyoso di mi cu awe mi a logra mi meta. Mi ta haya su falta pero esaki ta pa bo papi!” Tabata palabranan di Liliana Rasmijn hopi emociona cu awe e ta carga e departamento di comunicacion.

   Aruba brasa y acepta boso Vocero Policial nobo y e prome hende muher despues di Status Aparte. Cuerpo Policial Aruba ta yama danki na tur e voceronan cu tabata tey prome. Masha pabien Liliana di bo famia blauw y nan ta hopi orguyoso di bo.