Investigacion nobo pa caso di corupcion riba 3 funcionario di DIP

ORANJESTAD (AAN): Procurador General hunto cu LandsRecherche tin di escoge un nomber nobo pa un caso nobo di corupcion cu un biaha mas tin su enfoque den asunto di otorgamento di tereno.

   E nomber pa e “zaak” aki no ta conoci ainda oficialmente, pero hecho ta cu den fin di siman, un team di LandsRecherche reforza pa Recherche Samenwerkingsteam, bao supervision di Hues Comisario a presenta na Sabana Blanco pa tene un razzia den algun oficina.

   E entrada hudicial aki a enfoca riba lessenaar y kantoor caminda tin 3 empleado di Directie Infrastructuur en Planning (DIP) sinta y cu riba cual un investigacion a cuminza relaciona cu actonan incorecto cu nan lo a comete, y cu ta mustra di ta un asunto di corupcion.

   E funcionarionan hudicial a enfoca riba e desk di e tres empleadonan aki, y na final a sali di e edificio cu cahanan yena cu folders, documento, papelnan na cantidad.  Tambe a bay cu computer di cada tres funcionario di DIP cu ta bao investigacion.

   Esaki ta djis e comienzo di e investigacion.  E funcionarionan di DIP mes no ta sospechoso oficial (ainda).  E documentonan confisca lo tin di bay demostra sea cu nan a djis cumpli cu nan trabao, of cu si acaso a actua na forma no-prudente den aplicacion y/of procesamento di otorga tereno.