Homber tabata maltrata su pareha cu recientemente a haya yiu

Caso di maltrato na Ex Rondweg:

ORANJESTAD (AAN): Diasabra anochi algun hende a scucha grito di "ayuda" for di un cas, sigui pa golpi cu tabata cay. Mesora a notifica polis.

            Tabata mas o menos rond di 10'or di anochi ora cu polis a wordo yama pa un situacion urgente den un cas na ex Rondweg. Un homber tabata maltrata su pareha cu recientemente a haya yiu.

            Segun informacion, durante oranan mas tempran tabatin un fiesta na e luga. Despues cu tur invitado a bay, e homber a cuminsa busca problema cu su pareha, no permitiendo su acercamento na su baby cu apenas tin 1 luna di edad.

            Pafo di e cas, e homber a trata di maltrat'e fisicamente y verbalmente. Dos patruya di polis a yega na e sitio. Nan a papia cu e dama y a duna asistencia na manera cu nan por haya entrada na e cas. Polis a detene e homber, y un di e patruyanan mes a transport'e pa warda di polis.

            Na final, cu asistencia di polis, e señora a haya chens di piki su cosnan y sali cu su baby for di e cas. E caso a wordo notifica na e instancianan concerni pa duna siguimento.