Homber ta usa e Suzuki Swift di su mama pa horta tas di turistanan na Arashi

ORANJESTAD (AAN): Pa awor e mama a keda sin auto, como cu e vehiculo ta confisca!  Tur esey danki na su yiu homber cu a dicidi na fia e vehiculo pa bay comete ladronicia hunto cu su brothernan!

   Tabata Diahuebs atardi banda di 2:00 pm, na momento cu turistanan ta gozando den e dushi lama cu tin rond di Aruba, un Suzuki Swift a para na banda y un hoben a baha y a bay rumbo pa pertenencianan cu e turistanan a laga riba beach na Arashi.

   E persona aki a gara un Tas, y na careda a bay bek drenta e auto, pa asina nan desaparece di e lugar.

   Nan malasuerte ta cu varios hende a mira nan, y mesora a cuminza yama Polis.  Nan a nota con Suzuki Swift color shinishi cu number A-33045 a cuminza tuma caminda di Malmokweg bay pariba, y na e birada di Tierra del Sol a bira bay zuid rumbo pa Turibana.

   Un di esnan cu a mira esaki socede ta un Taxista, y el a dicidi na yama Polis y notifica nan kico ta pasando!  E momento pa actua a yega, y mesora Central di Polis a dirigi varios unidad rumbo pa e lugar.

   Diripiente e tres hendenan den e Suzuki Swift a ripara cu nan ta wordo persigui, y asina a dicidi na primi trot.  Pero mientras tanto diferente unidad di Polis tabata yegando cerca, incluyendo Polisnan Motoriza.

   Yegando banda di Sunny Supermarket na Saliña Cerca, a bin topa cu e Suzuki Swift, y e testigonan coriendo su tras a hasta zwaai man cu Polis pa mustra nan cu e auto ta sigui bay zuid.

   Esaki ta e momento cu e trio di ladron a sinti cu nan libertad ta yegando su fin, y uno di nan a habri bentana y rek zwaai e Tas for di vehiculo.

   E unidadnan di Polis a dal un buelta y net pazuid di e saliña, yegando den bario di Kamay, nan a blokea e vehiculo y pone baha di caminda y stop forzosamente tiki panort di Perfect Shine Carwash, cu ta un tiki panort di NG Supermarket.

   E tres personanan aki no a ni haya chens di huy, pasobra mas unidad di Polis y tambe esnan riba Brommer a yega.  E unidad di Polis Motoriza a core bay bek tiki panort pa recoge e Tas cu e ladronnan a benta banda di caminda.  El a recupera esaki y trece bek eynan.  Por a mira riba e cara di e ladronnan bira mas desapunta, ora cu nan a nota cu Polis a recupera e Tas.

   Cada uno a wordo baha di e vehiculo y a pone boei na nan man.  Polis a pidi e chauffeur pa nan mira su rijbewijs y demas documentonan.  Tambe a puntra e chauffer, kende ta doño di e auto.

   E chauffeur cu cara tristo a laga sa cu e auto ta di su Mama.  Su pober mama!

   E tres hobennan aki posiblemente ta envolvi den hopi otro caso di ladronicia di pertenencianan di turistanan den pasado.  Pesey mes cada uno a wordo deteni eynan mes, como sospechoso di a viola Articulo 2:289 y Articulo 2:288 di Codigo Penal di Aruba, y cu nan a wordo gara cu man den mansa.

   Nan a wordo transporta pa Warda di Polis na Strandpolitie, unda e sospechosonan di inicial M., di inicial B., y tambe di inicial M. a wordo presenta dilanti Fiscal Auxiliar.  Esaki a mira e seriedad di e caso, y a duna ordo pa nan wordo encarcela pa investigacion.  E vehiculo tambe a wordo confisca.  Ta bay investiga cuanto caso mas nan ta envolvi den dje, y ta bay revisa tur caso di ultimo siman- y lunanan unda cu testigonan lo por a mira cu e Suzuki Swift aki ta envolvi den dje.

   Awor e pober mama, sin auto pa core cune.  E potretnan aki pa cortesia di MasNoticia.com ta mustra momento di detencion, y e Tas di turista.  E turistanan sigur lo a keda contento cu a logra haya nan pertenencianan bek.