ORANJESTAD (AAN): Diahuebs alrededor di 6’or di atardi Wardacosta di Caribe Hulandes a
ricibi un melding di Cuerpo Policial di Aruba (KPA) cu un homber adicto ambulante a perde riba lama.
Mesora KPA a cuminsa busca e homber perdi den e area di e costa di Bushiri, Manchebo y Eagle Beach.
Wardacosta tambe a saca nan boto di reaccion rapido, y un Metal Shark pa e area di rif di Barcadera. Durante e buskeda, tanto e helicopter como e avion Dash di Wardacosta a wordo desplega pa yuda cu buskeda entre e boortoren (caminda e homber probablemente a landa bay) y e costa.
Inicialmente, e buskeda conhunto no a duna resultado, pero alrededor di 10'or di anochi e avion Dash 8 a mira e persona perdi cerca di e plataforma.
E tripulacion di e avion a notifica tanto e helicopter como e Metal Shark despues di a mira e homber. Mesora e helicopter a cuminsa hisa e homber for di awa. Despues di a his’e, a hiba e homber pa Aeropuerto Reina Beatrix, unda Cuerpo Policial di Aruba y ambulance tabata presente pa asisti’e.
E homber a sigui ricibi asistencia di autoridadnan local.
