Grupo di 23 studiante di e Opleiding di Polis a huramenta

ORANJESTAD (AAN): Cuerpo Policial Aruba ta sumamente contento di yama klas N4 2021 1 y 2 Bon Bini na nan organisacion policial.

            Den un celebracion ameno mayornan y famia por a presencia e huramentacion di nan yiu den un forma di Drive-By na Scol di Polis E.J. Watty Vos situa na San Nicolas.

            Ta trata aki di 23 studiante cu a huramenta dilanti Minister Sr. Rocco Tjon, altocomisario di Polis Sr. Ramon Arnhem y Hefe di Scol di Polis E.J. Watty Vos.

            Ta un aña pasa cu e klas nobo aki a cuminsa cu e trayectoria y preparacion pa nan por sigui e opleiding di Polis. Awor a yega e momento pa nan huramentacion pa asina nan por bay stage y sinti kico realmente ta e trabou di polis.

            Ta trata aki di 23 studiante di klas N4 2021 1 y2 cu a huramenta: J. Lesire, A. Maduro, R.Richardson, D. Simileer, J. Maduro, J. Thiel, O. Donato, D. Lopez, D. Croes, B. Lacle, V. Badal, J. Boeze, B. Dorothal, K. Cayama-Perez, R. Dirksz, J. Velasquez, R. Dinzey,  F. de Cuba, A. Andrews, J. Luna Zapata, J. Figaroa, D. Mathew y K. Pichardo.

            Tambe klas N4 2018 a termina nan estudio policial exitosamente. Despues di 4 aña di trabou duro y intensivo nan ta logra finalisa nan MBO politie opleiding.  Ta trata di 14 homber y muhernan balente cu awor ta cla y ful prepara pa brinda e servicio y seguridad pa nos Pais.

            Masha pabien y hopi exito na klas 2018: S. Tromp, C. Loopstok, D. Muñoz, E. Lampe, S. Genser, B. Pronk, J. Reigina, M. Hart, R. Tachi, K. Becker, A. Martis, R. Werleman, Z. Lopez y E. Bedoya Tovar.

            “Bo por a wak con orguyoso e agentenan nobo tabata ta y cu awor nan lo forma parti di e famia di KPA. E bunita tambe ta di mira con e studiantenan aki a bin cu nan Tata polis, welo pensioenado cu tabata polis y awor cu nan mes ta bay bira polis” Tabata palabranan di Minister di Husticia y asuntonan social Rocco Tjon cu tabata sumamente contento y orguyoso di mira famia compaña nan yui na un momento asina importante.

            Pa prome biaha altocomisario di Polis drs. Ramon Arnhem a presencia e huramentacion y entrega di diploma. “ Bo ta mira un bunita experencia awe di mira studiantenan huramenta pero e bunita di mira e aceptacion y ricibimento di nan den e organisacion policial.” Tabata e palabranan di altocomisario di Polis drs. Ramon Arnhem cu tabata honra di por a ricibinan.

            Hefe di Scol di Polis E.J. Watty Vos Sra. Richardson-Baars ta mira bek cu a forma un klas nobo pero tambe un klas ta finalisa nan opleiding cu exito. Ta esfuerso di e docentenan cu ta haci lo maximo pa yuda forma studiantenan pa bira Polis. Comunidad por ta orguyoso cu 14 Polis ta bon forma, educa na un forma professional pa bira e seguridad y servicio na nos pueblo. Den proceso tambe tin 23 studiantenan cu ta den e opleiding y dentro di algun aña tambe lo ta cla y bon prepara pa sirbi nos comunidad.

            Pa Cuerpo Policial Aruba nos ta mira caranan di mayornan hopi orguyoso di nan yui. Tata polis y welo pensioenado Polis cu tambe a compañanan nieto den nan momento, ta mira bek con nan tambe a cuminsa y awe e legado ta sigui. Na cada mayornan y famia danki pa boso sosten na boso yiu cu ta riba e caminda pa bira Polis. Sigui dune e apoyo y sosten. Nos di Cuerpo Policial Aruba ta hopi orguyoso di e studiantenan aki cu a keda cla cu nan prome aña.

            Pa e klas 2018 cu a termina nan estudio policial, esaki ta e momento pa cumpli cu e promesa di brinda e servicio y seguridad na cada ciudadano riba nos Pais. Hopi exito paso ta awor bo carera a cuminsa!